DEN HAAG—E miseria ekonómiko ku corona a okashoná lo tabata muchu mas grandi sin e paketenan di sosten ekonómiko gigantesko.

Pero e sosten a dura muchu largu segun Ofisina di Planifikashon Sentral (CPB) den un investigashon riba e efektonan di sosten di corona. For di kuminsamentu di e promé ola di corona, gabinete a duna un pakete di sosten di 30 miar euro. Ku esaki empresarionan por a sigui paga nan personal i nan gastunan fihó. Tambe nan por a paga belasting despues i empresarionan propio por a bai munisipio pa sosten di entrada. Esaki a yuda, ekonomia hulandes a kontrae ku 8% den e promé tres lunanan di corona, pero e dolor gobiernu a suavisá.

Prinsipalmente desempleo a keda abou ku e sosten di gobiernu. Kompará ku otro paisnan den Oropa Hulanda a keda duna sosten. E pakete tabata bon pa ekonomia, segun CPB. Tabatin temor pa un paro kompleto di ekonomia, pero aki a surgi e konfiansa ku hasta den pandemia ekonomia por rekuperá. Tin kritika tambe. Durante e krisis gabinete hulandes a duna sosten pa total 86 miar euro segun CPB. Gabinete mester a elimina e paketenan poulatinamente mas tempran segun CPB. Den kaso di sosten na empresarionan individual si esaki a sosode rapido. Den e segundo pakete di sosten e empresarionan individual mester a kumpli ku mas reglanan pa bini na remarke. E kondishonnan stringente por a keda apliká tambe riba e sosten ku kompanianan a haña pa paga nan personal i gastunan fihó. Empresarionan a haña un periodo largu pa postpone pago di belasting, segun CPB. Esaki a pone ku ekonomia a bai duru. E merkado laboral a keda perta i ekonomia a sigui krese. Tòg a sigui ku e sosten. Mester a para esaki muchu mas promé. Durante e pandemia e bankarotanan a keda minimal i hasta a baha. Entretantu e bankarotanan a subi. Mas empresa ta pidi yudansa pa paga nan retrasonan di pago.