CTB ku sosten di Gobièrnu di Kòrsou ta sigui ku su strategia di promové turismo pa medio di deporte.

Punda– Resientemente Ofisina di Turismo di Kòrsou (CTB) a lansa un video promoshonal nobo den kolaborashon ku nos ikononan lokal di Major League Baseball (MLB).

Andruw Jones, Jurickson Profar, Jonathan Schoop i Didi Gregorius a figura den e produkshon, den kua nan ta mustra di un manera dibertido kua ta e partinan mas dushi di pasa bo vakashon na Kòrsou. E video ta mustra Andruw, Jurickson, Jonathan i Didi sintá huntu ta hunga dominó i kada un ta splika for di su punto di bista e aktividatnan ku sigur bo mester hasi ora bo ta na Kòrsou. Di e forma aki CTB ke invitá futuro bishitantenan pa bin eksperensiá nos dushi isla Kòrsou meskos ku nos ikononan ta hasi. E video ta spesialmente dirigí riba futuro bishitantenan den nos merkadonan di enfoke; Estádos Unídos, Karibe i Latino Amérika ku tin interes pa biaha pa region Karibe i tambe amantenan di deporte.

E video promoshonal ta forma parti di CTB su strategia di promoshon di Kòrsou komo destinashon turístiko pa medio di deporte. Ku e video, CTB ke logra ku futuro bishitantenan ta keda asina asombrá di tur loke Kòrsou tin di ofresé manera kultura, arte, aktividatnan pa eksplorá nos isla i pa rilèks, ku nan ta tuma e desishon mesora pa bin eksperensiá e iterinario di nos ikononan di MLB pa nan mes. Filmashon di e video a tuma lugá durante algun luna na momentu ku e ikononan tabata disponibel durante off-season di beisbòl. A filma na diferente lokashon riba nos isla manera sentro di siudat, áreanan di naturalesa, tambe riba i bou di laman. E video a keda dirigí i produsí pa VIO Sambo Films i lo keda distribuí den formato di un komersial di 90 sekònde. Lo tin ademas diferente vershon kòrtiku di 30 sekònde ku lo keda usá riba medionan sosial pa ilustrá kon kada un di e beisbòlistanan ta eksperensiá nos isla.