Willemstad- Referiendo na e informashon ku a keda publiká , Curoil ta konfirmá di a risibí un ‘beschikking’ pa un ‘navordering’ di Douane di Kòrsou.

E ‘beschikking’ aki, ta trata un ‘navordering’ di ‘OB bij invoer’ i ‘invoerrechten’ riba produktonan petrolero ku Curoil mester a kuminsá importá, manera entre otro Mogas, pa por garantisá suministro di produkto pa merkado lokal, despues ku e refineria no tabata produsí mas. Pa loke trata LSD, ya Curoil tabata tin eksonerashon den forma di un ‘nultarief’ pa ‘invoerrechten’, ya ku e produkto aki no tabata disponibel na Refineria Isla.

Na 2019, Curoil a aserká Douane i tambe gobièrnu pa atendé ku e ‘OB bij invoer’ i ‘invoerrechten’, ya ku aplikashon di esakinan riba produktonan pa merkado lokal, lo a nifiká un subida di preis konsiderabel. Na e momentonan aki, Curoil ta den kontakto ku Douane i e gobièrnu aktual pa por sigui atendé ku e trayekto aki. Curoil lo keda den deliberashon ku meta pa yega na un akuerdo ku ta satisfaktorio pa tur partido envolví, prinsipalmente e konsumidó.•