Kas den Kaya Elias Nepomuceno kual e dama R. Clarke ke a kumpra pero nunka a risibí.

Willemstad,– Un dama ku fam Clark a entregá un denunsia kontra di e persona ku inisial A.B.L debí ku A.B.L no por responsabilisá kiko a sosodé ku e 135 mil florin ku a wòrdu risibí. .

Riba ret sosial un dama bibá na Inglatera ku fam Clarke a risibí notifikashon unda tin un kas na benta den e bario di Brievengat. E dama mesora a aktua riba su deseo di tin un propio kas i a kuminsá e proseso pa kumpra e kas pa un suma di 150 mil florin. E úniko problema tabata ku Clarke tabata biba na Inglatera, pues e mester a outorisá un persona na Kòrsou pa sigui kana ku e proseso pa kompra dje kas. Manera ta konosí kompra di un kas ta keda un proseso kompliká ku ta bira mas kompliká na momentu ku e kumpradó ta biba den eksterior.

Den e kaso aki, usando kontaktonan di konfiansa, Clarke a drenta den kontakto ku e dama ku inisial A.B.L kaminda A.B.L lo yuda fasilitá  proseso di kompra. Den práktika, A.B.L por wòrdu konsiderá un intermediario di kompra di kas kaminda A.B.L lo kana e proseso formal di kompra dje kas riba nòmber di e dama bibá na Inglatera, R. Clarke.

Segun transakshon nan disponibel Clarke lo a paga e dama A.B.L 135 mil florin i e kompania di A.B.L lo agregá 60 mil florin kual lo yega na e suma sufisiente pa kumpra e kas den Brievengat situá den Kaya Nepomuceno. Ademas, Clarke lo a firma un kontrakto di finansiamentu ku kompania di A.B.L kaminda Clarke lo paga bèk e suma di 60 mil florin den 2 aña mas 5% di interes. 

Riba diferente okashon A.B.L tabata manda screenshot indikando ku e sèn nan risibí di Clarke a bai pa notario, pero den realidat ta trata di screenshotnan falsu. Ta asina ku A.B.L ta manda un screenshot indikando ku un pago di 135 mil florin a sali di kuenta di First Caribbean/CIBC i bai pa kuenta di banko dje notario. Tambe, riba diferente okashon A.B.L a splika e víktima Clarke, ku e ta pendiente kontesta dje notario, pero alfinal nada no tabata sali afó.

Ta na momentu ku e dama a bin Kòrsou na sèptèmber 2022, el a kuminsá investigá e kaso el a nota ku A.B.L ta estafando e kompra dje kas. Na momentu ku Clarke a konfrontá A.B.L, e dama no por a duna ningun deklarashon bálido indikando kiko a sosodé ku e suma di 135 mil florin. Tampoko A.B.L no por a duna ningun prueba ku e transakshon nan a wòrdu hasí na notario. Mirando e echonan ariba menshoná riba 29 di sèptèmber 2022 e víktima Clarke a opta pa entregá un denunsia formal na warda di polis na Rio Canario.

Denunsia entregá

Riba e denunsia entregá hefe agente polisial Elvilla a tende e deklarashon nan di e dama i hink’é formalmente den un denunsia. E denunsia a keda hasí riba 29 di sèptèmber 2022 den oranan di mainta na warda di polis Rio Canario. Clarke ta denunsiá e dama A.B.L di lo a tuma sèn entre 30 di sèptèmber 2020 te ku 17 di febrüari 2022.

Kompania di A.B.L ta sera su portanan

Segun informashon disponibel na kámara di komersio, A.B.L lo a dal porta di su kompania sera riba 3 di Aprel 2023. E kompania a keda fundá riba 20 di Aprel 2020 kual tabata algun luna promé ku A.B.L a kuminsá risibí sèn di Clarke pa kumpra e kas. E rason dikon A.B.L a dal porta si su kompania sera ta deskonosí.