Back to Top
Vigilante banner image

Dama kondená pa perhurio den kaso asesinato Libanesa


June 14, 2021 • 3 minüt pa lesa

A kondená e dama na 3 luna di prizòn inkondishonal.

Nieuwe Haven— E dama Suthline S. Pieter ku a kometé perhurio den e kaso asesinato Libanesa a risibí un kondena di 3 luna ayera. Wes a tene kuenta ku e mester wak su yu, ku e ke sigui studia i paso nèt awor e la risibí un kas na Hulanda.

Ta trata di un kaso di asesinato ku a tuma lugá dia 2 di sèptèmber di aña 2019 ku a tuma lugá na Libanesa na altura di Caracasbaaiweg. Unda ku na yegada di polis na e sitio a bin topa ku un hòmber sintá den un outo ku algun herida di bala na parti ariba di su kurpa i e persona no tabata duna señal di bida. Na e sitio dòkter di Polis a konstatá morto di e víktima Genciel Feller. Pa e kaso di asesinato aki hustisia a pèrsigui e 3 hòmber nan Gabi Alberto, Shaba Jakobus i Jami frans komo e responsabel nan pa morto di e víktima Feller. A sentensia tur na 20 aña di prizòn, di kual nan no a keda satisfecho ku e kastigu i a disidí di bai korte apelashon.

Pa loke ta trata e kaso aki e dama S. Pieter tabata pareha di e akusado Alberto, e dama a basha bou tur kos den e kaso aki i promé ku e la hasi esaki OM a primintié ku nan lo protehé i tambe ku nan lo yude na Hulanda pa ku kas etc. Den pasado e dama aki a deklará ku el a tende for di boka di Jami ku e huntu ku Gabi a bai kometé e kaso di asesinato i lo a kometé esaki ku Gabi su outo. E frei di Gabi tabatin un aparato instalá den su outo sin e sa, kual tabata skucha su kombersashon nan i lo e tabata papia ku Jakobus i Frans tokante e kaso. 

Dia  27 di Mei tras di lomba e dama mester a bin Kòrsou pa asina duna su deklarashon den sala di korte, esaki segun petishon di e abogado nan di e akusadonan.  Tabata durante tratamentu di e kaso den korte di apelashon ku e dama aki tabata bou di huramentashon ku e la bòltu su deklarashon kompletamente. Segun e dama ku e la traha un dil ku Ministerio Públiko di kual nan no a tene nan mes na dje, i ku tambe e mes tabatin su yu ku e mester a okupá di dje, p’esei e la gana. Despues di ku esaki a sosodé fiskal a pidi pa por a traha un prosèsverbal pa e dama debí ku e la kometé perhurio i a pidi pa nan detené mes ora di kual e tres wesnan a bai di akuerdo.

Ayera durante tratamentu di e dama su kaso e la duna di konosé ku lokual ku a la deklará den korte di apelashon esei ta kuadra. Esaki tabata ku e no ta kòrda kiko Jami a bisa i ku  e no ta kòrda ku Jami a bisé ku nan ta esunnan ku a bai i mata Feller. E dama a splika ku e tabatin miedu pa su seguridat i ku su yu ta tur kos pe p’esei e la gana den prinsipio pa e por a sali i bai serka su yu. Wes a bisé ku awor lo keda ku duda den e kaso paso no sa ki ora e ta papia bèrdat i ki ora e ta gana, mirando ku komo un akusado bo por gana pero si bo ta un testigu bou di huramentashon bo tin e obligashon di bisa bèrdat.

Fiskal a splika ku normal mente den tipo di kaso nan asin’aki mester hasi demanda di un kastigu alrededor di 6 aña, pero mirando ku e dama su sirkunstansia nan personal i ku e ke studia i kuida su yu e no ta mira un pakiko pidi un kastigu haltu asina. Fiskal a hasi un demanda di 6 luna inkondishonal. Wes no a bai di akuerdo ku e demanda di fiskal i a kondena e dama na 3 luna di prizòn inkondishonal.

Login