Outoridatnan a akudí na e sitio mesora despues di a keda notifiká di e maltrato.

Nieuwe Haven— Un hòmber kende ta akusá di intento di asesinato i agreshon kontra di su èks pareha ya ta for di detenshon preventivo. Inisialmente e akusado tabata den aresto preventivo pa maltrato di su pareha na òktober 2024. Pero abogado mr Tromp a logra skòrs detenshon dje hòmber pendiente tratamentu den korte penal.

Ayera e kaso a keda tratá i ta trata di un kaso basta serio di krímen pashonal. Ministerio Públiko a inisiá un kaso kontra di un hòmber ku a kòrta  su èks pareha na ámbos man. Despues di un keho na sentral, polis a logra di detené e hòmber ku a hasi su mes kulpabel na maltrato di un dama ku e tabatin relashon kuné na unda e la usa un kuchú pa korte na ámbos man. Ministerio Públiko ta akusando e sospechoso riba maltrato severo i intento di asesinato. Tabata riba djárason 23 di òktober 2024 alrededor di 07.19’or, Sentral di Polis a dirigí un unidat pa Seru Fortunaweg pa un kaso di intento di asesinato, maltrato i menasa.  Na yegada di e unidat el a konstatá un dama ku tabata maltratá.  E víktima a deklará na polis ku un ratu promé su èks pareha a maltrat’é ku un kuchú na ámbos man.  Kontinuando ku e investigashon na e sitio polis a detené e hòmber A.M di 49 aña di edat nasé na Kòrsou pa e intento di asesinato, maltrato i menasa ariba menshoná.

Demas investigashon a resultá ku ta trata di un suseso basta violento. Riba 24 di òktober 2024 e dama lo a dal A.M ku telefòn den su kabes durante un diskushon. Segun A.M, akinan e insidente a kuminsá”. Segun investigashon, e hòmber lo a kue un kuchú i grita su èks parehá ku e tei mat’é. Alabes, A.M lo a bisa ku e tei pega e kas na kandela. Un dado momentu e víktima lo a kore sali for di e kas sunú i a bai skonde den kas di su mama den un kamber. Akinan a resultá ku e akusado a bai kue un kuchú mas grandi i asina e akusado a logra habri porta dje kamber kaminda e pareha tabata skondí aden.

E akusado a atmití den e kaso ku el a aktua robes na òktober tras di lomba, pero e hòmber a splika ku no ta tur informashon ta kuadra. E akusado a insistí ku e suseso a kuminsá despues ku e dama lo a maltraté. I e promé kuchú, el a kue debí ku e kuchú aki tabata den kamber ku su yu tabata aden. “Mi no ke mi yu hunga ku e kuchú den kamber i p’esei mi a kue”. Tambe a akusado a splika ku el a bai kue e otro kuchú pa habri e porta kaminda ku su pareha a sera.  “Regularmente ora lòk e kamber kaminda e yabi ta keda será den e kamber, nos ta usá kuchú pa habri e kamber”, e akusado tabata splika hues den sala di korte. Despues di a habri e kamber, e akusado a splika den su vershon ku el a pidi e víktima pa bai afó pa papia i akinan e kòrtá nan na man di e dama lo a tuma lugá mirando ku e ruman nan dje dama tabata want’é.

A.M a splika na òktober e tabata sufri basta pisá di depreshon i akinan e lo a kuminsá abusá di supstansha. Den pasado A.M lo a kometé vários delito di agreshon pa abuzu di supstansia, pero entretantu e akusado a risibí entrenamentu pa abuzu di supstansia i entrenamentu di agreshon.

Fiskal a indiká ku tin sufisiente prueba ku un maltrato a tuma lugá riba 24 di òktober 2024. Tantu e denunsia di e víktima i deklarashon nan testigunan a konfirmá e echo kastigabel. “E delito tabata basta severo sigur mirando ku tabata tin yu den serkania durante e maltrato” fiskal a splika. Na unda banda un kastigu ta nesesario mirando ku un delito a tuma lugá, pero un kastigu mester sòru tambe e situashon no ta surgi mas. Notabel den e kaso aki ta ku fiskal a elogiá kon e hòmber a traha bon pa drecha su bida despues di e suseso.