Direktor di Aqualectra a pidi diskulpa na pueblo ayera pa e echo
ku un biaha mas nos tabatin un blackout for di den
oranan di mèrdia te den oranan di anochi.

Willemstad,– Direktor di Aqualectra señor Darick Jonis a bisa ayera ku un biaha mas Kòrsou a enkontra ku blackout for di 2’or di mèrdia i ku Aqualectra a bin ta bringa durante hinter mèrdia ku esaki i tabata den oranan di atardi ku a logra start e mashinnan, pero lokual el a bin ta splika ta ku, nan a bin ta ‘bouw op’ e retnan i poulatinamente bo ta kuminsá pone bo ret di 66 mil vòlt despues esun di 30 mil i kaba esun di 12 mil pa duna e kasnan koriente.

“Nos a bin ta hasi esei, pero mi ta poko kouteloso, paso den e vershonnan anterior, ora a yega sierto kaminda e retnan a bolbe kai den otro”, asina señor Jonis a duna di konosé. El a splika tambe ku nan ta bezig ta kanando pasonan basta chikí pa garantisá ku kada paso ta ok. Señor Jonis ta bisa ku e sa ku e  pregunta ta bira kiko a kousa e blackout atrobe, e ta bisa ku e blackout ta bini di e  sistema di protekshon ku ta kita e planta for di riba ret di un forma inkomprendibel ainda. Tambe e ta bisa ku nan ta bezig ku análisisnan preliminar. Pa loke ta por ehèmpel e blackout di dia 7 di desèmber señor Jonis a bisa ku e rapòrt ta kla. Hunta di komisario i minister a instituí un grupo pa hasi e investigashon i ta kanando ku e grupo miéntras ku tambe a tuma medida riba algun kos i ta sigui ku mas investigashon.

“Ta di lamentá ku un biaha mas no tin koriente, pero pueblo por ta sigur ku Aqualectra ta trahando duru i hasiendo tur esfuerso pa duna koriente bèk na pueblo”, pues señor Jonis di Aqualectra. El a bisa ku di kurason Aqualectra ta pidi diskulpa pa lokual a pasa ayera.