Manchi Harms: un yamada urgente na sektor privá.

Veeris—E kosto total pa organisá karnaval, ta hopi mas haltu ku lokual gobièrnu ta duna na supsidio. Esaki ta lokual por konkluí for e rueda di prensa ku Fundashon Desaroyo Karnaval Kòrsou, FDKK a tene djaweps último den studionan di KONTENTU.

Segun e presentashon Herman Manchi Harms, kende ta presidente di FDKK, na e momentonan aki tin un défisit prekualkula di por lo ménos 550.000 florin pa por logra organisá e temporada di karnaval 2023. Ta prekalkulá un nesesidat di 1.45 mion florin pa organisá e evento mas grandi na Kòrsou. E fundashon ta konta ku kasi 525 mil florin na donashon i supsidio di e.o. gobièrnu di Kòrsou, 200 mil florin na programa di donashon i ta spera di por akapará alrededor di 175 mil florin na eventonan di rekoudá fondo. Konsekuentemente ta keda kasi 525 mil florin sin finansiamentu.

Harma ta spera di por konta ku sektor priva riba esaki. Djaweps último e presidente a hasi un yamada urgente na sektor privá pa yuda duna sosten na e evento mas grandi di Kòrsou. Organisadónan di karnaval ta premirá un kresementu grandi den e próksimo 3 añanan durante nan enkargo pa organisá Karnaval.