DEN HAAG—Gabinete ta spera pa 2023 un défisit den presupuesto di 7,5 miar euro, segun minister Sigrid Kaag (Finansa) den e nota.

E défisit den presupuesto ta kousa pa gastunan ku gabinete a hasi pa kompensá e preisnan di energia kresiente. E nota ta e último ahuste di presupuesto pa e aña aki. No ta kla ainda kon gabinete ta bai kubri gastunan di medidanan pa tene kuenta di energia pagabel pa siudadanonan i kompanianan. E limite di preis pa koriente i gas pa kasnan ta bai kosta segun kalkulo 11,2 miar euro i e sosten pa kompanianan mediano ku ta gasta hopi energia ta kosta 1,7 miar euro. Gabinete ta reservá tambe 400 mion euro èkstra pa kompensá skolnan, universidatnan i organisashonnan kultural pa e gastunan haltu di energia. E 400 mion euro ta pa instanshanan ku ta keda finansiá parsialmente pa ministerio di Enseñansa, Kultura i Siensia. Skolnan ku a haña problema kaba pa gastunan haltu di energia, por mèldu na servisio di enseñansa (DUO). E loket ku a instalá spesial pa esaki ta keda habrí, segun minister Dennis Wiersma. Normalmente ministernan ta haña algun porsentahe aserka pa kubri gastunan haltu. Pero pa motibu di inflashon haltu e aña aki, pa e guera na Ukraina, ta trata e aña aki di un suma mas haltu. Kalkulonan di e défisit pa kua gabinete ta bai buska kubrimentu, a alkansá miares di euro. e suma eksakto tambe ta insigur, pasobra e ta depende kon e preisnan di energia ta desaroyá. Den último tempu el a baha den zomer. Parti di e gastunan gabinete ta spera di kubri e gastunan aki ku èkstra belasting riba kompanianan di energia. E interes kresiente riba debe di estado tambe ta un problema. Kontralí na e sosten di energia un biaha, esaki ta un gastu struktural. Hulanda por a fia plaka kasi gratis riba merkado kapital debi na e interes abou ekstremo pa años. Awor ku e interes a subi mundialmente, mester refinansiá e debenan na interes haltu. Esaki lo kosta na kalkulo 5,8 pa 9,2 miar euro èkstra pa aña. E guera na Ukraina a kosta kaha di gobièrnu kasi 4,5 miar euro. Mitar a bai na yena e deposito di gas Bergermeer, asina Hulanda ta ménos dependiente di gas ruso próksimo winter.