Back to Top
Responsive image
E korant di pueblo

Demanda di 10 aña pa hòmber akusá di a duna órden pa kima Ontvanger


March 6, 2021 • 2 minüt pa lesa

E edifisio di ofisina di Impuesto ku a wòrdu sendé na kandela.

Nieuwe Haven—Ayera korte a trata kaso kontra di e hòmber S. Francillon unda ku ta akus’é di a manda  2 hòmber bai kima e edifisio di Ontvanger. Tambe ta akusá Francillon di hòrtamentu di awa i koriente i laba mentu di plaka. Ayera Fiskal Janssen i Teepel a hasi un demanda di 10 aña pa e akusado i tambe e lo mester hasi pago di 42 Mion na daño ku a ser kousa na e edifisio ku a ser kimá.

Tabata djaweps 22 di ougùstùs di aña 2019, alrededor di 03.09’or di mardugá ku Sentral di Polis a risibí un notifikashon ku den e edifisio di servisio di impuesto na Regentesselaan tabatin un kandela. Mesora a dirigí unidat polisial na e sitio. Na yegada di e unidat polisial, a konstatá ku e parti sùit di e edifisio tabata na kandela i parti paden di e edifisio tabatin basta desaroyo di huma. Unidatnan di brantwer ku tambe a yega rápidamente na e sitio, a kuminsá ku nan trabounan pa asina por a kombatí i paga e kandela. For di investigashon preliminar a sali na kla, ku e kandela a kuminsá ku tur probabilidat parti paden di e edifisio Den oranan mas lat di mainta, personal di e departamento tékniko forensiko di polis, a kuminsá ku nan investigashon, pa asina determiná ku eksaktitut, kiko tabata kousa di e kandela aki. Daño na e banda sùit di e edifisio i sigur e piso abou, a sufri daño konsiderabel di tantu e kandela mes, pero tambe huma i awa. Ta trata di e parti di e bali nan unda sa hasi e trabou di kobransa.

Pa e kaso aki Ministerio Públiko tin prueba kontra di e akusado S. Francillon. Esaki despues ku Rudy Medina kende ta será na Boneiru, lo mester ta esun ku a keda detené promé i a kuminsá basha bou, ku konsekuensia ku a bin detené e hòmber Sergo Francilon  pa e kaso. E kaso aki a bini dilanti na algun okashon kaba unda  ya a bin dilanti ku ta 14 mil florin a paga pa kima e edifisio di Ontvanger. Segun ekspertonan e daño kousá ta laba den 42 mion florin i ku tambe a eksistí peliger pa ku bida di e dos bewakernan ku tabata trahando na e momentu ei. Pa e kaso aki a skucha vários testigu i tambe a enkontra vários kos ku ta inkriminá S. Francillon. Entre otro un eksperto di Aqualectra tambe a konstatá ku tabatin hòrtamentu di awa i koriente.

Fiskal a enfrentá e akusado ku e akusashon nan aki i e la duna di konosé ku e no tabatin nada di aber ku e kaso aki i ku e ta inosente. Tambe OM ta pensa ku e akusado lo tabatin vários motibu pa por a kima Landsontvanger, un di e motibu nan aki tabata ku servisio di impuesto  a kobr’é un suma di plaka basta haltu. Fiskal a hasi un demanda di 10 aña di prizon kitando e 15 luna nan ku ya e tin sera kaba i tambe e mester paga   di 42 Mion na daño ku a ser kousa dor di e insendio na e edifsio. Korte lo dikta sentensia den e kaso dia 26 Mart próksimo.

Login