DEN HAAG—Maneho nobo di gabinete pa kombatí skarsedat di personal den kuido ta yuda pero lo no ta sufisiente pa solushoná e skarsedat.

Den próksimo 10 aña e demanda pa mas personal lo oumentá, segun pronostiko di merkado laboral ku minister Conny Helder (Kuido) a manda pa Tweede Kamer. Fin di e aña aki lo tin skarsedat di 56.000 personal den hospital, kas di kuido i kuido pa personanan desabilitá. Prinsipalmente for di 2026 e skarsedat lo oumentá mas. Den 2032 e skarsedat lo ta mas ku 155.000 trahadó si no tuma medida. Asina leu ku por kalkula medidanan di gabinete, nan ta yuda pero ainda lo tin falta di 137.000 trahadó. Segun e minister tin mester di asina tantu personal di kuido den futuro ku lo tin menos hende disponibel pa enseñansa, konstrukshon i sektor di energia. Pa e motibu aki gabinete no kier pa mas ku un hende riba 6 trahadó traha den kuido. E pronostiko aki lo keda alkansá den 2029. Esaki ta demostrá ku ta nesesario pa limitá e demanda di labor den kuido, inisiando un transishon pa kuido adekua i ampliashon di kontratonan laboral den kuido, segun e minister. E pronóstiko ta keda prepara un biaha pa aña. E aña aki e panorama ta mas negativo ku aña pasá.