“E kuido ku nos ta duna ta na peliger i e situashon no por sigui asinaki”

OTROBANDA – Ayera den oranan di mainta, Curaçao Medical Center a tene un konferensha di prensa ekstraordinario relashoná ku e último desaroyo rondo di kudio elektivo pa pashèntnan di SVB.

“E kuido ku nos ta duna ta na peliger i e situashon no por sigui asinaki”, esaki ta lokual dr. Ingemar Merkies kende ta direktor médiko na Curaçao Medical Center a duna di konosé na komienso di su presentashon durante e konferensha di prensa. For di 2020 CMC a indiká ku e presupuesto no ta sufisiente pa duna kuido i a inisia diferente akshon pa trese kambio. E situashon prekario ta unu ku CMC a splika no solamente na e gobièrnu aktual si no tambe e gobièrnu anterior. Ademas, e situashon di Covid-19 tambe a trese gastunan adishonal ku no tabata presupestá.

Komo gerensia di CMC, Ingemar a splika ku CMC  tinku garantisá kuido en general pero en partikular kuido agudo i esensial. Pa garantisá e kuido aki, esaki ta nifiká ku mester buska finasiamentu adekuá i baha e kantidat di kuido elektivo.  Dr. Ingemar a splika ku gastunan di CMC ta mas haltu ku gastunan di SEHOS. Alrededor di 75 % di CMC su gastunan ta fiho. Esaki ta repartí den 51% ku ta gastunan di personal, 19% ku ta gastunan di kapital i 5% depresiashon. Na e momentunan aki, CMC su gastunan ta suprasá e entrada.

Segun datos presentá pa CMC, 84% di gastunan ta bini for di pashèntnan di SVB. Miéntras SVB ta kubri solamente 70% di e gastunan. Konsekuentemente, debe di CMC ta sigui krese. Na aña 2019, CMC tabatin un defisit di 3.7mion, na aña 2020 esaki a oumenta na 27.2 mion i te ku ougùstùs 2021, CMC su debe ta pará na 51.1mion. Pues ta opvio ku CMC no por sigui karga e gastunan.

Pa  garantisá kuido agudo i esensial a pone ku CMC a trese algun kambio pa lokual ta trata maneho di kuido te ku fin di aña. E promé desishon tabata pa stòp Kuido Elektivo pa pashèntnan di SVB temporalmente te ku yanüari 2022. Tambe CMC a splika ku mester introdusí tarfianan nobo. E tarifanan aktual no ta sostenibel i no ta yega pa kubri gastunan di un hòspital ultra moderno manera esun ku Kòrsou a skohe pe.

Segun Ingemar, CMC lo kontinuá ku e trayekto pa baha gastunan intero i eksterno. Merkies a splika ku CMC a hasi vários esfuerso pa mantené i baha gastunan di hòspital. Manera, renogoshá kontraktnan vigente di material i remedi di kuido. Segun Merkies, esaki ta yuda baha gastunan ku kasi 2mion. Alabes, CMC a tuma akshon pa baha gastnan manera esnan relashoná ku laboratorio. Mas aleu, CMC ta sigui den kombersashon ku gobièrnu pa por yega na un solushon pa komunidat di Kòrsou.