E akusado ku tabata den korte di apelashon.

Nieuwe Haven—Korte di apelashon a trata e kaso ayera di e akusado E. Jantje, esaki despues ku segun su deklarashon el a bira malu i a haña un ‘blackout’, ku a pone e bai kontra di man i bai dal violentamente kontra di un otro vehíkulo ku resultado fatal.

 Durante tratamentu di e kaso  Prokurador General  a hisa su demanda i a pidi un kastigu di trabou di 240 ora i tambe a pidi pa e retené su reibeweis pa 2 aña.

Tabata 7 di aprel di aña 2018 ku e hòmber Jantje tabata move huntu ku 3 persona mas den un vehíkulo, riba Winston Churhillweg, kual el a splika den korte ku el a kuminsá sinti su kurpa malu na momentu ku e tabata manehá e outo. Segun Jantje su deklarashon ku dado momentu e la kuminsá sinti su kurpa malu i ku e la bin sospecha despues di ku por tabata un ‘blackout’. Dor  ku e la sinti su kurpa malu e la pèrdè kontròl riba e vehíkulo ku e tabata manehá i a  bai dal den un otro vehíkulo ku konsekuensia ku tur persona ku tabata den e vehíkulo i vise versa a risibí leshon. Tabatin total kuater  herido di kual 2 hòmber i 2 muhé. Na yegada di e patruya polisial na e sitio a bin topa ku 2 outo, outo number 1: un Ford Focus kòrá i outo number 2: Un Scion pretu.

Un di e víktimanan, kual ta un di e dama nan ku tabata sintá dilanti banda di shofùr di outo number 1 a bin fayesé na e sitio e dama aki tabata Raïsha Rationella Offerman, nasé na Hulanda 15 febrüari 1992.  E  sobrá tres 3 víktimanan mester a keda transportá pa SEHOS pa por a haña tratamentu médiko debí ku kada unu a risibí ku leshon(nan) ku ta varia di kap na kachete, ènkel / man frakturá. Den korte na promé instante a kondena e akusado na 120 ora di trabou, miéntras tambe e wes a bisé ku pa 6 luna e lo a pèrdè su reibeweis. Tambe tabatin un suma ku e akusado mester a paga pa daño inmaterial na e partido perhudiká. Durante tratamentu di e kaso den korte di apelashon  Prokurador General a duna di konosé ku e no ta masha konvensé ku e akusado lo por a haña un ‘blackout’ manera e ta deklará. Debí ku na vários okashon e la kambia su deklarashon i pa ayera e la bisa ku tabata un ‘blackout’ e la haña.

Prokurador General a puntra e akusado dikon na momentu ku e la pensa ku ta un ‘blackout’ e la haña, e no a bai dòkter pa por a bai kontrolá i ku dikon ta awor despues di 2 aña ta bisa esaki. Prokurador General a hasi un demanda   di 240 ora di trabou pa e akusado i tambe pa retené  su reibeweis pa 2 aña i tambe e mester paga kompensashon na famia di e víktima. Wes a bisa e akusado ku e ta haña e deklarashon ku e la trese dilanti di ku e ta pensa ku ta un ‘blackout’ e la haña hopi straño. Pero a puntr’é ku si na momentu ku e la sinti si kurpa malu dikon e no a bisa e 2 otro persona nan ku e tabata den outo esaki. E akusado a bisa wes ku na e momentu ei e no a pens’é asina. Wes lo duna sentensia den e kaso aki dia 4 di Mart benidero.