E organisadó a risibí un kondena di 15 aña. 

Nieuwe Haven,– Durante tratamentu di e kaso den apelashon wes Carmelia  ku ta forma parti di e tres wesnan den korte di apelashon a dikta ku e ta haña e sentensia di 15 aña na su lugá debí ku korte ta konsiderá e ròl di Basilia determinante  pa e morto di Djais ku Champi na Hato.

Apesar ku Basilia no tabata presente na e sitio durante e tiroteo ku a  bin terminá den dòbel asesinato, ta Basilia a duna Martis, miembro di NLS, e informashon di e posishon di Djais. Ta e amigu di Basilia, esta Martis kual ta será ku un kondena di bida largu, a sòru ku e hòmber nan Maria i Martina lo a kometé´e tiroteo riba e dia en kuestion. E dos hòmbernan aki tur dos a risibí un kondena  di 12 aña i 14 aña i ta será na Hulanda pa nan propio seguridat.

Ku Basilia ta miembro di e gèng NLS ta keda afirmá tambe debí ku e ta bon amigu di  Judrin Martis alias MOB i ta Basilia a manda Martis un mensahe ku Djais lo yega Kòrsou riba 15 di Jüli 2014, 19:30 or den avion di Air Berlin. Ademas ta lidernan di NLS lo a buta un suma di NAF 1.000.000,- riba e kabes di Djais pa e wòrdu likidá.

Wes Carmelia a duna di konosé tambe ku e no ta aseptá e punto di diskushon kaminda abogado Sulvaran a bisa ku e persona C. lo a duna mas hende e informashon di Djais. Wes no a aseptá e punto aki debí ku C. a duna di konosé ku el a duna solamente e polis De Windt e informashon aki, paso el a kere tabata tin un investigashon polisial riba Djais. Ademas e deklarashon di C. a keda afirmá dor di un otro testigu, F.

Pa determiná e straf di Basilia, wes a analisá diferente aspekto den e kaso. Ta asina ku OM por determiná ku dos persona a bin pèrdè nan bida. Tambe diferente víktima den bisindario a risibí bala durante di e balasera . Durante e tiroteo, e miembronan di NLS a usa arma outomatiko pisá , kual segun wes Carmelia a shòk e komunidat di Kòrsou por kompletu. Banda ku mester a duna diferente víktima tratamentu pa aliviá nan leshon nan, e suseso a duna Kòrsou un mal nòmber bou di e sektor di turismo, esaki ta debí ku ta nèt na e entrada di Korsou esaki a tuma luga. Diferente turista no tabata sinti nan mes seif mas. Tambe wes a duna di konosé ku Basilia a praktiká soborno di un ámtenar polis.

Basilia a paga e polis Xavi De Windt, NAF 35.000,- 1 siman despues di e tiroteo i e lo paga e sobrá NAF 15.000,- riba un otro dia.

Debí na tur e aspektonan aki segun, wes Carmelia por konkluí ku e ròl di Basilia ta krusial durante e Hato Shooting. Ta pesei wes a dikta ku e sentensia di 15 aña ta adekuá pa Basilia.