Miami,- Un flèt 10 kilometer for di Miami Beach a kai den otro den oranan di mardugá riba djawebs. Mesora outoridat a kuminsá ku un búskeda den e área di e edifisio pa buska sobrebibiente.
Segun brantwer por lo ménos un persona ya a fayesé i tin basta hende leshoná. Tur víktima tabata biba den e edifisio ku a kai den otro. E edifisio ta mas o ménos 6 mia for di Miami Beach den e bario “Surfside”. Na momentu ku a tuma nota ku e edifisio a kai den otro, brantwer i agente polisial a kuminsá ku un búskeda intensivo pa asina trata na saka mas tantu sobrebibiente posibel. Lamentablemente nan a haña un kurpa sin bida.
Den un video riba Twitter por tuma nota ku brantwer a logra di saka un mucha hòmber basta hóben. Brantwer di Miami-Dade a duna di konosé ku mas ku 80 personal di brantwer ta trahando na e sitio pa sigui buska hende ku a sobrebibí e kaida di e edifisio.
Hòpsital na Aventura a risibí 3 pashènt kaminda dos persona ta den un situashon delikado. E di tres persona si ta den un kondishon stabil.
Sgun testigunan na e sitio ainda tin mas hende pegá den e shushi dje edifisio.