Back to Top
Vigilante banner image

Departamentu di Hustisia no ta rekonosé 2 mion di debe na Hector Henriquez


December 8, 2020 • 2 minüt pa lesa

Hector Henriquez na Caracasbaaiweg.

Punda—E kompania Hector Henriquez mester inisiá un proseso nobo den korte si e kier logra haña un pago di 2.1 mion serka gobièrnu di Kòrsou. Departamento di Hustisia a sinti tera moli na momento dos faktura a yega atministrashon pa paga. Mesora a surgi preguntanan ku a keda sin kontesta.

Manera Vigilante a publiká ampliamente riba e kaso, Hector Henriquez ta buskando pago di 2.1 mion florin na komestibel ku nan a entrega na prizon. Pero, hefe di atministrashon finansiero na departamento di hustisia no por paga pasobra despues di investigá, no tabatin un kontrakt firmá entre prizon i Hector Henriquez. Mas serio ainda, minister Girigorie no a duna aprobashon por eskrito. Konsekuentemente, Hector Henriquez a entrega pa un periodo largu komestibel na prizon sin kobra. Dia a manda faktura, algun wènkbrou a hisa den atministrashon na Punda.

Segun gobièrnu di Kòrsou nan no tin niun akuerdo ku Hector Henriquez riba entrega di kuminda na prizon. Pero direktor di e instituto si a firma un órden di entrega pero no por ta papiando di un akuerdo di entrega. Pero ta diferente entrega di kuminda tabatin for di 2017 ku nunka gobièrnu no a paga e fakturanan. Prizon i Gobièrnu ta argumentando ku e órden di entrega ku direktor di e instituto a firma no ta komprometé e pago, sino mester di un apoderashon òf firma di minister di hustisia. Atministrashon na prizon tampoko no a tuma akshon miéntras trùknan di Hector Henriquez tabata drenta sali fo’i den prizòn.

E kaso ta andando den korte i for di yüli i ougùstùs tabatin tratamentu. Konforme areglamentu di kompatibilidat, Hector Henriquez i Prizon no a aktua konforme proseder. Pa por a sigui tuma entrega serka Hector Henriquez, kada entrega mester tabatin e apoderashon nesesario, anto esaki no tabata e kaso. Den karta riba 4 di febrüari a bin deskubrí ku prizon i HHB a trata na kumbiní pa sigui tuma entrega di kuminda pendiente un kontrakt di entrega. Abase di esaki for di 2017 te ku 2020 a sigui manda kuminda pa prizon, pero e minister di hustisia no tabata sa pasobra nunka no a hasi un súplika pa su apoderashon òf aló ménos esei no ta presente. Un akuerdo ta bin paresé riba mesa fechá 10 di ougùstùs 2020, pero korte ta splika ku firma un akuerdo despues di entrega no ta korespondé ku e areglonan di kompatibilidat.

Den dokumentashon di korte ta sali dilanti ku gobièrnu a manda e hefe di atministrashon finansiero korte durante tratamentu. Miéntras no tin un apoderashon di minister, gobièrnu no por paga i esei a sosodé tambe. Atministrashon na Departamentu di Hustisia, a nota falta den proseder atministrativo lokual pa gobièrnu e entreganan di komestibel tabata ilegítimo. Chèns ta hopi grandi, ku Hector Henriquez lo inisiá un proseso a fondo den korte.



Login