Jadey O’niel i Zaidi Hasham,
e dos fundadónan di C’Life Lounge of Beauty

SANTA ROSAWEG – Ayera den oranan di mèrdia, Jadey O’niel i Zaidi Hasham, e dos fundadónan di C’Life Lounge of Beauty a selebrá apertura ofisial di nan promé lokalidat situá riba Santa Rosaweg. Esaki despues di 3 aña konosí komo un tienda ònline.

Den presensia di Pastor Curtis i algun invitado speshal, Jadey O’niel i Zaidi Hasham huntu ku nan yunan a kòrta e sinta pa asina ofisialmente habri portanan di nan salon di beyesa. C’Life a kuminsá 3 aña pasá komo un boutique di paña prinsipalmente ònline. Klientenan por a bestèl via di e tienda ònline i risibí nan paña òf merkansianan via di entrega. Banda di e tienda ònline, C’Life tabata usa algun lokalidat fisiko pa organisá loke nan sa yama ‘Pop Up Store.’ E terminologia ‘Pop Up Store’ ta unu ku ta wòrdu usá na momentu ku un tienda ta aparesé durante un periodo limitá òf temporal.  Esaki ta algu ku C’Life tabata hasi sigur durante dianan di fiesta pa asina duna klientenan e oportunidat pa pasa shòp serka nan den un lugá físiko.

C’Life ta para pa “Celebrating Life” kual ta e lema ku ko-fundadó Jadey O’niel ta para tras di dje, pa “selebrá bida dia pa dia.” E lema aki ta netamente lokual a yuda nan krese i mantené nan merkado durante nan eksistensia. E servisio personalisá ku C’Life ta ofresé kombiná ku un oumento den demanda pa nan merkansia a poné e dos empresarianan disidí ku ta tempu pa amplia nan negoshi i buska un lugá fiho kaminda klientenan por shòp den un seno ameno. No opstante un lokalidat pa nan klientenan shòp so no tabata sufisiente pa Jadey i Zaidi. Nan kier a nifiká mas pa e hende muhénan den nos komunidat. Ku esaki den mente nan a opta pa amplia nan servisionan i transformá C’Life den un salòn di beyesa.

E konsepto di C’Life Lounge of Beauty a kristalisá despues ku Jadey i Zaidi a nota ku tin hopi hóben empresaria den e mundu di beyesa sin un lokalidat fiho pa ofrese nan klientenan. P’esei kada servisio ku C’Life Lounge of Beauty ta ofresé ta wòrdu manehá dor di e hóbennan empresaria di e sektor di beyesa den nos komunidat.

Aworaki, na C’Life Lounge of Beauty bo por shòp na C’Life Boutique, hasi kabei, sejas i “lashes,” tambe tin servisionan di manicure i pedicure. Bo por asta tuma masashi i hasi e método di ‘sugaring.’ Pues, C’Life Lounge of Beauty ta un “one-stop shop” pa tur lokual ta trata beyesa di hende muhé. Nos di parti di Vigilante ta deseá tur e empresarianan di C’Life Lounge of Beauty hopi éksito.