Koraalspecht– E Komité Europeo pa Prevenshon di Tortura i Trato Inhumano òf Denigrante (CPT) a konstatá durante su bishita den Sentro di Detenshon i Korekshon Kòrsou (SDKK) na mei aña pasá, ku no tabatin instalashonnan adekuá pa personanan ku kapasidat limitá, esta personanan desabilitá.

Na Mei 2022 Minister di Rechtsbescherming sr. Franc Weerwind for di Hulanda i Minister di Hustisia sr. Shalten Hato, huntu ku demas kolaboradónan di Hulanda i Kòrsou a hasi un bishita di trabou na Sentro di Detenshon i Korekshon Kòrsou

Nan tabata i ta ketu bai dependé di bontat di otro prezunan na momentu ku nan ke usa tualèt òf baña. CPT a formulá un seri di rekomendashon pa mehorá e kondishonnan material i pa sigurá ku e grupo akí ta será den kondishonnan ku ta permití nan mantené nan dignidat.

Mayoria di e personanan ku e delegashon di CPT a papia kuné den e prizònnan den Karibe, no tabatin keho tokante maltrato di parti dje personal di prizòn. No opstante, e delegashon a risibí algun akusashon sí di uso eksesivo di forsa i di komportashon ònbeskòp, spesialmente kontra e miembronan dje timnan di intervenshon spesial na Aruba i Kòrsou durante inspekshon di sèl. Tabatin akusashon kontra e wardadónan di prezu na Sint Maarten tambe tokante nan mal trato durante nan maneho ku prezunan rebelde òf durante situashonnan di violensia entre e prezunan (bringamentu ètsetera).

CPT ta mustra den su rapòrt ku registrashon di uso di forsa dor di e personal tabata defisiente i ta rekomendá pa tene un registro den e prizònnan. Tambe tabatin diferente episodio di violensia entre prezunan mes, apesar dje esfuersonan di e personal dje diferente prizònnan ku CPT a bishitá, pa evitá violensia entre prezunan. Por ehèmpel ta identifiká esnan ku no ta bai bon ku otro fo’i ora nan drenta prizòn i durante nan estadia i tambe na momentu ku ta manda nan otro departamentunan mas sigur. Tambe ta limitá e interakshon entre prezunan di diferente sektor. CPT ta bisa ku e esfuersonan pa bringa e fenómeno akí mester kontinuá, apesar ku no por evitá tur biaha ku nan ta bira violento ku otro.

Durante e bishita di e delegashon na Point Blanche na Sint Maarten, nan a konstatá ku e kondishonnan material tabata generalmente aseptabel, apesar ku den hopi parti dje prizòn akí tabatin señalnan evidente di desgaste. Apesar di algun reparashon, e kondishonnan material den e instituto penitenshario na Aruba (KIA) i den SDKK tabata generalmente pober. Mayoria dje prezunan tabata den sèlnan deteriorá, sushi i ku plaga. “Bañonan sanitario den sèlnan ku diferente detenido ta biba aden, no tabata separá kompleto i tabatin algun sèl ku muraya ku “schimmel” pretu. Ademas den mayoria dje sèlnan na KIA tabatin tres prezu será den un espasio di alrededor di 9,5 meter kuadrá i e kondishonnan tabata pèrtá. E situashon tabata lamentabel den unidat EBA di SDKK i den unidat di isolashon den Point Blanche. Ademas no tabatin instalashon adekuá pa personanan ku kapasidat limitá. Nan tabata dependé di bondat di otro prezunan si nan ke usa baño òf dush. CPT ta formulá un seri di rekomendashon pa mehorá e kondishonnan material i pa sigurá ku e personanan ku kapasidat limitá ta será den kondishonnan ku ta permití nan mantené nan dignidat.”

Segun CPT, tabata positivo sí ku mayoria dje prezunan por a pasa 6 te 8 ora pafó di nan sèl. Un kantidat di prezu tabata traha, (apesar ku den mayoria kaso tabata pa un tempu limitá di algun ora pa dia) i tambe tabatin algun aktividat di tempu liber i deporte disponibel. “Sinembargo, a keda un echo ku mayoria dje prezunan tabata pasa mayoria di nan dia hasiendo nada. CPT ta ripití ku e meta mester ta, ku tur prezu (inkluso esnan ku ta den aresto preventivo) por pasa un parti rasonabel di nan dia (esaki ta 8 ora òf mas) pafó di nan sèl, hasiendo diferente aktividat ku tin sentido. Esaki ta rekerí hür personal spesialisá pa ofresé aktividatnan organisá.”