Abogado Athena Sulvaran tabata esun ku a hiba defensa di e akusado. 

Nieuwe Haven—Korte a trata un kaso unda ku ta akusá e hóben Kevin Calle Ibanez Flores di a kometé un total di 16 atrako huntu ku diferente sospechoso mas  i ta akuse di poseshon di arma di kandela.

Ayera wes a dikta sentensia den kaso di Flores unda a redusí e kastigu di 12 aña pa un detenshon hubenil. Abogado A.N Sulvaran tabata esun ku a hiba defensa di e hóben aki.

E hóben Kevin Flores ta keda akusá di a kometé un total di 16 atrako esaki tantu na bibienda i tambe establesimentu i tur esaki nan a sosodé den ora nan di mardugá i ku basta agreshon. Ta akus’é tambe di tabata den poseshon di un arma di kandela. E 16 atrako nan ku e hóben aki a kometé, tabata e esun nan ku OM por a proba ku e tabata tei presente. Den promé instante Flores a keda demanda  na 12 aña di prizon pero tabata na final di òktober di aña pasa ku wes a disidí ku tòg ta bai bolbe habri e kaso di Kevin pa wak si e por haña un detenshon hubenil.

For di inisio Flores a deklará ku e no tin nada di aber ku niun kaso di atrako, kual tambe el a indiká ku e otro akusado G. Curiel ku tambe ta akusá di ta involukrá den vários kaso di atrako lo mester a menshoná su nòmber i lo ta gaña riba dje. Segun OM e hóben Flores a pasa den situashon nan basta pisá den su bida apesar ku e tin solamente 19 aña di edat. Ta asina ku Flores su tata tin un historia ku hustisia kaba i e tata e yega di kai será den pasado kaba. Tambe e mama di e hóben tin problema ku su salu i tin indikashon ku e persona ku a kria Flores a keda asesiná i ta Flores mes tabata e persona ku  a deskubrí e kurpa sin bida den e kas. Segun resultado di sikólogo, Flores ta un hóben ku no por drecha su manera di biba mas, paso den pasado e tabata risibí yudansa kaba for di instanshanan i yudansa nunka no a resultá.

E sikiater si ta pensa otro tokante e hóben Flores. E rapòrt di sikiater ta duna di konosé ku debí ku e hóben ta yòn ainda, e mester risibí e chèns pa risibí training pa integrá bèk den komunidat. Abogado mr. Sulvaran a duna di konosé ku den 5 aña nunka e no tabata di akuerdo ku e resultado di e sikiater pero den e kaso aki, si e ta di akuerdo. Den pasado Flores tabata bisa ku e no tabata ke bai  SDKK bèk paso e otro detenidonan sa hòrta su materialnan. Asina Flores a konfrontá nan i debí na esaki el a risibí un kap na su kabes. Despues di a deklará esaki fiskal a pidi pa kambia e hóben su blòk riba término kòrtiku i tambe el a pidi pa trese hóben pa e fundashon di brasami i einan e lo risibí trainingnan i kursonan pa e por integrá bèk den komunidat.

Wes a bisa ku e ta total mente di akuerdo ku e petishon ku tantu e fiskal komo e abogado a trese dilanti durante tratamentu di e kaso lastu biaha. Wes a bisa ku Flores ta hopi yòn i ku tin hopi oportunidat nan ku bida lo por trese pe, pero ku si e no haña e training òf yudansa nesesario e por bolbe bai n’e mal kaminda. Wes a duna e hóben Flores un kastigu di 2 ana pero den brasami. Tambe e hóben mester haña guia pa ku su edukashon pa asina e por ta un mihó persona den nos komunidat.