Tres: na dos okashon IHS Markit a faya pa skohe un sosio optimal i tin duda riba nan di tres rekomendashon, Klesch.

Parera—E dudanan riba CPR komo un sosio stratégiko no mester ta un sorpresa si bai bèk den e proseso ku gobièrnu a start ku e kompania IHS Markit.

Ta di tres okashon ku aktual gobièrnu di Kòrsou a faya den nan intentonan pa por logra haña un sosio stratégiko pa Refineria Isla/RdK. Aparte di a kibra un akuerdo ku Guangdong Zhenrong Energy, nan no a logra ku ningun otro sosio rekomendá pa e kompania IHS Markit den pasado. Eseinan tabata Count Energy, Klesch i awor problema ku CPR.

E pregunta importante ta, dikon gobièrnu ta opta pa sigui traha ku IHS Markit, sabiendo ku den nan promé intento ya kaba e trayekto di proyekto “Arawak” tabata manchá. E aktual proyekto Arawak, kual proyekto ta deliniá e pasonan pa yega na un sosio stratégiko pa Refineria Isla a sigui faya despues ku Grupo Klesch tambe a bin kai afó. IHS Markit, kompania ku for di aprel 2018 ta duna asistensha na Refineria di Kòrsou, a keda sin hasi e deligensha nesesario na momento el a konsehá Refineria di Kòrsou pa sinta na mesa ku e promé sosio Count Energy. Un rapòrt konfidensial ku RdK a  laga hasi (Ivy Report), a kuestioná konfiabilidat di funshonarionan ku Count Energy a uza. Aparte di Klesch den kaso di CPR awor ta indikando mesun kos. Falsifikashon di dokumentashon i ousensia di lisensia pa importá derivadonan di krudo.

Apesar di tur krítika, tòg gobièrnu i maneho di RdK a skohe mesun kompania, IHS Markit, pa guia e proseso pa e Project Management Organization nobo instalá pa RdK. Riba rekomendashon di IHS, a skohe, Count,  Grupo Klesch i awor CPR. Semper a keda un nubia skur riba IHS ku por tin konsekuensha pa e trayekto di Arawak. Count Energy spesífikamente ta unu dje motibunan dikon Ministerio Públiko a laga arestá 4 persona na Kòrsou den kaso Lacerta. I ta netamente IHS a skohe Count komo pa gobièrnu bai sinta na mesa kuné. Count a faya, despues Klesch a faya i tog a opta pa keda ku IHS kual a resulta den e trayekto di CPR.