Bulto di droga ku a keda konfiská na kosta nort ayera mainta.

Willemstad—For di den oranan di mardugá Warda Kosta huntu ku Polis tabata vigilando un boto sospechoso  ku tabata nabegando na e parti Nort di Kòrsou ku probablemente tabatin un kargamentu di droga abordo.

E sistema di radar di Warda Kosta den oranan di mardugá a señalá un boto sospechoso nabegando na e parti nort di Kòrsou den direkshon di Plestikbaai. Esaki a pone ku mesora a pidi asistensia di Polis pa e bahia di Plestikbaai. Na yegada di polis enbèrdat nan a señalá un boto riba laman kual mesora a kambia di ruta i a sigui nabegá den direkshon di nort. Esaki a pone ku polis a pidi mas refuerso i huntu ku warda kosta a kuminsá kontrolá e bahianan na e parti nort di Kòrsou. A hasi uso di e avion di warda kosta ku a bolbe detektá e boto den serkania di plantashi Wacawa ku a sigui  den direkshon di e bahianan i òf boka ku tin na e parke Christoffel. Dado momento a bin pèrdè e boto for di bista pero a tuma nota di algun persona kargando bulto na kosta. Esaki a pone ku polisnan a subi e tereno di parke Christoffel pa asina a bai kontrolá i a bin topa ku un kantidat di bulto benta den mondi no masha leu for di e bahia Boka Grandi. Ta sospechá ku ta netamente einan a logra di senk e boto pa despues saka e bultonan subi tera ku nan. Polis mesora a pidi asistensia di e tim di aresto pa asina huntu ku warda kosta konfiská no ménos ku 21 bulto ku tabata kontené tantu mariwana i tambe kokaina. A sigui ku búskeda den e mondi pero no a bin topa ku e tripulantenan. Riba laman warda kosta a sigui ku nan búskeda i a bin topa ku barinan ku tabata kontené gasolin ta drif i tambe un bulto ku tabata kontené droga. A konfiská esakinan i a bai na e Playa Piskadó na Westpunt na unda warda kosta a bin tuma esakinan pa asina por a transportá pa e departamentu di droga ku lo kontinuá ku e investigashon. despues di a tèst e droga i tambe a pisa esakinan a destruí nan mesora. E kaso ta den investigashon.