Mesora na entrada di e seminario a krea un ambiente futurístiko.

Tema: ‘Artificial Intelligence and the future of aviation’

WILLEMSTAD – Djabièrnè dia 14 di mart último tantu e posibilidatnan komo e desafionan di Inteligensia Artefisial (Artificial Intelligence, AI) den aviashon di futuro a bini dilanti for di diferente ángulo. Esei a sosodé ku oradornan invitá durante e seminario anual ku Dutch Caribbean Air Navigation Service Provider (DC-ANSP), e sentro lokal di kòntròl di tráfiko aéreo, a organisá e mainta ei den atrium di Renaissance Wind Creek Resort ku e tema aktual: ‘AI & The Future of Aviation’.

Den nan introdukshon komo apertura di e serminario tantu direktor general di DC-ANSP, señora Micilia Albertus-Verboom, komo minister Charles Cooper di VVRP a indiká ku AI ya no ta un soño mas. AI ta un instrumento inovativo ku atraves di koperashon den e gremio por kondusí na mas seguridat, mas efisiensia i durabilidat den aviashon. Entre e wéspetnen tabatin tambe minister di Turismo, Asuntunan Ekonómiko, Transporte i Telekomunikashon di Sint Maarten, señora Grisha Heyliger-Marten.

Outo-desaroyo
Orador prinsipal Matthew Griffin (futurista i direktor di 311 Institute) a presentá su mes komo un berdadero defensor di aplikashon di AI, pasobra e por yuda desaroyo di e sektor di aviashon hopi mas rápido ku promé pa bai dilanti. AI ta karakterisá pa outo-desaroyo; konfrontá ku problema e mes ta proponé adaptashonnan adekuá, i komo ku esei ta sosodé prosesando un kantidat grandi di dato, e ta hopi mas lihé ku kapasidat di e ser humano, esaki ta hasi un diferensia grandi. Ademas, pa tur sorto di organisashon den e ramo di aviashon ta konta ku nan por saka probecho riba diferente tereno, di ehekushon di e trabou spesífiko te i ku formashon di kolaboradornan nobo.

Responsabilidat
E otro oradornan, tur for di aviashon, ta habrí pa AI komo esei ta e futuro, pero nan ta demostrá mas koutela pa loke ta su aplikashon. Por ehèmpel, señor Leonardo De Abreu Ladeira (senior policy and market regulator) di Regulatory Authority Curaçao a kuminsá bisa ku AI ta adelanto, pero e no ta un remplaso di hende. Ta na gobièrnu pa determiná un stratégia pa opshonan sosio-ekonómiko, un infrastruktura adekuá, klaridat pa loke ta responsabilidat i un base firme pa algoritmonan. Kaminda originalmente UNESCO den pasado a teme pa pèrdida di puesto di trabou, el a mustra a base di un ehèmpel di UNESCO mas resien ku AI hasta por krea mas funshon nobo di trabou.

Señora Kim Macualay (senior VP Information & Data) di IATA a indiká ku serka nan e kompanianan di aviashon afiliá ainda ta eksplorando kon pa apliká AI. Aparte ku den nan seno nan a habri kombèrsashon enkuanto aplikashon di AI i ku nan sigur ta mira e bentahanan di dje riba diferente tereno, entre otro brinda pilotonan rutanan alternativo den korto tempu, nan ke tòg investigá un ke otro mas profundo. IATA ta kompartí e datonan ku e kompanianan di aviashon i ta traha na interkambio di konosementu tokante uso di AI.

Señor Ronald Dubbeldam (General Manager System & Infrastructure) di tráfiko aéreo LVNL di Hulanda a bisa ku nan ta vigilá e faktor humano atentamente. Nan ta apliká AI kaba riba algun tereno pa respaldá e diferente sentronan di tráfiko aéreo na Hulanda i nan ta investigando kon den futuro AI por ofresé mas opshon outomatisá. E ta premirá ku den futuro lo usa AI mas i mas pa  maneho di kapasidat, algu ku Schiphol por bai probechá di dje.

Segun señor heer Ramón Tarrech Masdeu (senior technical advisor) di e empresa di teknologia Spañó Indra Group den e kompleksidat di technologia di awendia no por salta e faktor humano. El a mustra ku kada bes mas ta inkorporando AI den sistemanan eksistente pa aviashon.

Diskushon den pènel
Den e diskushon den pènel tokante kon AI ta transformando e industria di aviashon na final di e seminario, vários otro aspekto a bini dilanti a base di preguntanan di partisipantenan, pa gran parti tokante e konsekuensianan di aplikashon di AI den e sektor. Alafin señora Micilia Albertus-Verboom di DC-ANSP orguyosamente a klousurá e enkuentro eksitoso, ku diferente gimmick teknológiko.