Back to Top
Vigilante banner image

Diferente speshalista por move for di CMC


June 5, 2023 • 2 minüt pa lesa

Rueda Prensa: 97 spesialista den servisio na CMC ta pendiente un veredikto den korte.

OTROBANDA— CMC ta den problema serio i ta dependé riba un veredikto sivil ku spesialistanan a entamá kontra di Gobièrnu. Si e asosashon di spesialista LVMPiLC, pèrdè e kaso, por spera un salida grandi di hopi spesialista for di CMC kousando mas retraso riba lista di operashon.

Lista di espera di operashon na CMC, por yega entre 2500 pa 3000 pashènt na finalnan di 2023 si no bini un solushon riba e problema di spesialistanan. Esaki ta lokual spesialista dr. Vito Koejiers a duna di konosé ayera durante un rueda di prensa. E asosashon di spesialista LVMPiLC  ta teme lo peor.  Aparte di no tei risibi mas spesialista, tin riesgo ku esnan presente tambe lo sea bandoná Kòrsou òf CMC pa buska un mihó entrada. Hopi spesialista na CMC ta sinti nan mes engañá, despues di a djòin CMC pa awor gobièrnu mes pone un plafon salarial riba nan.

Segun dr Michel Berry, durante un rueda di prensa, nan organisashon no a tende mas di gobièrnu riba e problemátika di un plafon salarial mediante di e Lei Máksimo Salarial LNT. E proposishon di Minister Interino pa Asuntunan di Salubridat Públiko, Javier Silvania, pa desviá for di e Lei Maksimalisashon Salario (plafon), pa por akomodá médikonan spesialista, ainda tin un trayekto largu pa kana. Manera ta konosí, Silvania kende alabes ta minister di Finansas, a hiba un reunion bastante largu ku representashon di Médikonan Spesialista di Kòrsou. 31 di mart último, a keda kumbiní ku minister Javier Silvania, pa entrega un proposishon na Hunta di Minister unda lo eksonerá e spesialistanan for di e plafòn salarial. Despues di einan no tabatin nada mas i problema a kuminsá.

segun e spesialistanan , no ta bai pa e sèn, sino mas bien pa e kontinuidat di kuido. E problema ta si mantené e plafon salarial, Kòrsou ta sigui tin problema pa atkerí spesialista. N’e momentonan aki, tin 97 spesialista envolví den e problema. Aparte di kontinuidat i kapasidat, e spesialistanan ta protestando tokante e echo ku gobièrnu a pone CMC riba e lista di kompanianan ku ta mará na un salario máksimo konforme e asina yamá landsverordening normering topinkomens (LNT). CMC ta aparesé riba anekso 3, ku ta e lista di NV-nan. Segun LVMPiLC (e asosashon di spesialistanan) esaki ta un fayo òf aló ménos un desishon no bon pensá, ku gobièrnu mester revoká. E lei ta regla ku tur entidat grandi por paga 295 mil florin máksimo i esnan chikí por paga 227 mil florin máksimo pa aña na funshonarionan den tòp di e entidatnan menshoná. LVMPiLC a tuma nota ku HNO Transitie en Exploitatie NV (lesa CMC) ta menshoná riba anekso 3. Esaki ta nifiká ku e lei ta konta pa nan tambe. Djasabra 11 di mart último,  e  médikonan spesialista a reuní ku minister Javier Silvania. Durante e reunion den despacho di reunion di e minister na Pietermaai a diskutí e problema di plafoná nan salario mediante e lei LNT. E spesialistanan a atvertí e minister riba e problema di eksodo. Tambe a splika e minister riba e riesgo ku hopi spesialista no ta bin Kòrsou pa traha. N’e momentonan aki tin un lista di 2 mil pashènt wardando. Sin solushon, e lista di espera por yega 3 mil pashènt na desèmber 2023.

Login