Back to Top
Vigilante banner image

Digitalisashon sentral den plan anual di Konseho pa Mantenshon di Lei


April 12, 2022 • 1 minüt pa lesa

WILLEMSTAD — E Konseho pa Mantenshon di Lei (Raad voor de Rechtshandhaving) e aña aki lo pone mas atenshon riba digitalisahon. Esaki ta e rumbo ku e pandemia a hinka e tim aki aden di tur manera. E plan anual 2022 tambe ta trahá teniendo kuenta ku e desaroyonan rondó di Covid-19.

For di inisio e meta tabata pa bin ku resultadonan di inspekshon usabel i práktiko. Pero e limitashonnan ku Covid-19 a krea tabatin su efekto riba e manera di traha dje Konseho. A mustra riba esaki kaba den e plan anual di 2021. E Konseho ya tabatin intenshon di hasi trahamentu for di kas mas efektivo. E intenshon ta tambe pa tene mas entrevista i reunionnan digital.

Hasiendo uso di digitalisashon for di aña pasá kaba e Konseho por a kuminsá ku basta dje inspekshonnan planiá. E pandemia a stroba biahamentu, loke a stroba tambe inspekshonnan riba e otro islanan. Pero den medio 2021 a start i ta sigui hasi investigashonnan nesesario.

Lo traha riba optimalisashon tambe dje komunikashon di parti di Konseho pa Mantenshon di Lei, hasiendo uso di nan website. Lo profeshonalisá e website aki i hasie mas atraktivo pa usuarionan.

Konseho pa Mantenshon di Lei su bista ta fihá primeramente riba hasi inspekshonnan apesar dje limitashonnan, pa asina kumpli ku e vishon di kontribuí na un bon funshonamentu di instanshanan hudisial, dje kadena hudisial i di kolaborashon entre paisnan riba tereno hudisial.

E tarea prinsipal di Konseho pa Mantenshon di Lei ta pues hasi investigashon. Pero tambe nan ta monitòr kòmbersashonnan di account ku e organisashonnan hudisial. I periódikamente ta papia tambe ku e diferente stakeholdernan tokante e organisashon i tambe ehekushon dje rekomendashonnan. Lo sigui tur kòmbersashon segun e plan anual 2022.

Login