Back to Top
Vigilante banner image

‘Discover Your Greatness’ otro proyekto ku ta konta ku sosten di Banco di Caribe


May 5, 2022 • 2 minüt pa lesa

WILLEMSTAD: Tur hóben mester di motivashon, inspirashon i kurashi pa deskubrí nan máksimo potensial. Banco di Caribe ta kere firmemente ku proyektonan manera esun di ‘Adventure Camp Curaçao & Social Forming Kids’ organisá pa Fundashon Skol di Arte i Kultura Futuro Briante ta importante pa formashon di un hoben. E aña aki e tema ‘Discover your greatness’ ta vehíkulo pa enkurashá e hoben deskubrí su potensial!

Tokante Fundashon Skol di Arte i Kultura Futuro Briante

Pa algun aña kaba Fundashon Skol di Arte i Kultura Futuro Briante ta organisá kampamentu pa hoben. Na 2010, e fundashon a kuminsá ku ‘Adventure Camp Curaçao & Social Forming Kids’ pa mucha i hoben di entre 4 i 12 aña di edat. Na 2018, e fundashon a restrukturá e programa ku enfoke riba aktividatnan edukativo, deportivo i rekreativo. Aktualmente e programa aki tin 12 aña brindando sosten sosial na mucha- i hóbennan ku ta eksperensia difikultat den nan desaroyo. E fundashon ta dependé di donashon i kontribushon finansiero pa realisá e proyektonan manera duna konseho na mayornan, plania aktividat sosial i rekreativo ku meta preventivo. Aktualmente e tim ta konsistí di boluntario ku ta duna nan granito ku masha ánimo.

‘Equine Therapy’ – Kampamentu 2022

E aña aki e mucha- i hóbennan a disfrutá un kampamentu di 6 dia i 5 anochi kargá ku aktividat, tantu individual i den grupo. E aktividatnan tabata variá; aventurero, edukativo pero tambe trankilo bou di guia profeshonal.  Un di e aktividatnan tabata ‘Equine Therapy’, esaki ta un terapia ku ta stimulá konfiansa propio, bon komunikashon, kontròl emoshonal i ta enkurashá e hoben pa kalkulá i tuma rísiko. Naturalmente, koriendo kabai e hóbennan ta pasa un momento ameno i relahante tambe. Un di e benefisionan primario di ‘Equine Therapy’ ta un salú mental optimal. Banco di Caribe a haña e proyekto aki masha bunita i a patrosiná e terapia pa e muchanan.

Un pabien na Fundashon Skol di Arte i Kultura Futuro Briante ku e proyekto! Tabata bunita pa mira kon e hóbennan a disfrutá, i na mes momentu siña kon pa deskubrí nan forsa interno i desaroyá nan talentonan. Banco di Caribe ta mashá kontentu di por a duna un aporte na desaroyo di e hóbennan i por mira ku nan a disfrutá di nan periodo di kampamentu.



Login