WILLEMSTAD,—-For di djamars tras di lomba, durante di e Jump In di Lokura di Grupo “Alo Loko”, na momentu ku diferente hende a mira e popular Dj RO-1, ku tambe a presentá den e evento, mes ora esaki a lanta masha hopi spekulashon.

No ta un sekreto ku Dj RO-1 na algun okashon kaba, ta partisipá den marcha di Karnaval ku “Grupo Estreno mas Pikete”, den  e sekshon di Urban. I esaki a bai ku hopi éksito tambe. Pero awor tin un buèlta nobo i sigur un buèlta sumamente interesante.

T’asina ku Giana Jansen ku ta ruman di Dj RO-1 ta na kabes di Grupo “Alo Loko” huntu ku su Kasa Kenley Jansen, i tambe Ardley Jansen ku ta ruman hòmber di Kenley Jansen i tambe nan a instalá un direktiva kompletamente nobo.

Pero e pregunta ku ta kologá den kaya, for di djamars tras di lomba ta, kua desishon Dj RO-1 ta bai tuma, paso ya a bira konosí ku Grupo “Alo Loko” tin un sekshon di Caibbean Bachanaal Viba, aki ta trata di un sekshon di Urban Area i esaki ta netamente loke ku Dj RO-1 ta speshalisá den dje. Vigilante Farándula ayera a yama Dj RO-1 na diferente okashon, pero sin resultado deseá. Hopi hende sigur ta hopi interesá pa sa, ta kua desishon Dj RO-1 ta bai tuma, ku si e ta sigui ku Grupo “Estreno Mas Pikete”, òf e ta bula waya bai “Alo Loko”, serka di su ruman muhé ku e ta Stima masha hopi mes.