Brievengat, — “Tumba di Kòrsou” ta den un peliger serio. Un dokumental ku Vigilante tin 4 aña ta trahando riba dje lo keda publiká na Òktober próksimo i lo subi tarima internashonal riba diferente plataforma.

Festival di Tumba, durante último dos aña ta oumentá e daño okashoná na e herensia di Tumba. Antropólogonan, Areglistanan, Kompositornan , Músikonan i Kantantenan di e herensia “tumbero” ta mustra nan prekupashon riba e desaroyo komersial di Tumba, pèrdiendo e balor ku tumba realmente tin den nos kultura.

Ta di urgensia pa Gobièrnu di Kòrsou intervení mas lihé posibel den AMAK pa Kòrsou no pèrdè e balor i kultura di Tumba. Festival di Tumba i AMAK atraves di tempu a okashoná ku e Tumba no ta aksesibel mas pa e pueblo. Mester “paga” pa mira un festival di un ritmo netamente di Kòrsou. Pa AMAK i Festival Senter e  Tumba a bira sèn i negoshi. Logrando nan meta di maksimalisashon di ganashi riba “tumba” , hasta den Gran Marcha no ta toka e tumba mas. Na final ta toka tumba, miéntras segun Mafalda Minguel (Q.E.P.D.), “ántes nos ta habri fiesta ku un tumba i sera e fiesta ku un tumba”.

Entretantu Kòrsou mester paga pa tin akseso na tumba, pasobra a pèrdè e herensia, kultura i balor di e ritmo ku un tempu tabata un “poder polítiko” den e pais.