Back to Top
Responsive image
E korant di pueblo

Tripulashon venezolano ta risibi 100 mil dòler na Kòrsou


February 13, 2021 • 2 minüt pa lesa

Willemstad,– Korte di hustisia a tuma desishon riba e kaso kaminda tripulashon di e barku Wisconsin ku ta pertenesé na International Marine Supply LCC na Panamá representá pa e kantor di abogado Van Eps Kunneman Van Doorne a hasi un demanda kontra doño di e barku aki ku a keda representá pa abogado Wilsoe.

E demanda tabata pa e echo ku segun e tripulashon di e barku Wisconsin ku ta inkluí tambe e kapitan i di kual  den gran mayoria ta di Venezuela, e doño lo mester paga nan kasi 300 mil dòler esaki ta debí na retraso den pago di salario. E abogado Rogier van den Heuvel a trese dilanti tambe ku kada un di e tripulantenan ta eksihí un pago di 5000 dòler adishonal debí ku nan kier bai nan pais bèk i no tin vuelo, pues nan lo mester bai via via.

Abogado Wilsoe kende ta esun ku a defendé e doño di e barku a splika hues ku e asuntu di bai bek Venezuela, di tur manera lo tabata difísil mirando e asuntu di Covid-19, pues di niun manera nan lo no por a bai via Spaña ets manera nan ta pretendé.

Tambe Mr. Wilsoe a splika e hues ku e doño di e barku ta konsiente ku e debe e tripulashon sierto pagonan di salario, pero mirando e efekto ku Covid -19 tabatin riba e barku, pues ku no tabatin trabou, el a bin kai atras na pago, pero no pa e sumanan ku nan ta pidiendo.

El a bisa ku e tin akuerdo firma pa loke ta e suma ku a debe na e trahadónan. Finalmente e siman aki korte a tuma un desishon i a baha e suma di kasi 300 mil dòler na apénas 100 piku mil dòler. Tambe hues a splika nan bon kla ku mester usa leinan di Kòrsou, mirando ku ta aki nan ta i ku lei internashonal ta bisa ku un kaso lo ser trata konforme lei di e pais kaminda bo ta pegá. Normalmente e tripulashon aki ta kai bou di leinan di e pais Repúblika Dominikana.

Finalmente den su desishon tambe e hues a bisa ku e tripulashon bèrdat di ningun manera por a bai bèk Venezuela di e forma ku nan a trese dilanti i a bisa ku nan kada unu unabes di haña 5000 dòler, lo risibí apénas 800 dòler, porsierto un diferensha basta grandi kompará ku 5000 dòler ku a ser pidi.

Login