Back to Top
Vigilante banner image

Dos aña “grace period” pa Oryx ta konfirmá otro interesnan


December 11, 2024 • 2 minüt pa lesa

Newton Firma ku Oryx: ta duna 2 aña pa konkretisá

Isla–  E dos kompanianan, ku te ainda ta mustrando di ta bai ópera riba tereno di Refineria Isla, Global Oil i Oryx Petroleum, no tin aktividat riba tereno di Isla. Pa kolmo un anunsio resien di Refineria di Kòrsou (bou di nan nòmber nobo) di duna Oryx 2 aña pa inisiá, ta motibunan pa bolbe kuestioná maneho petrolero di Kòrsou.

Aparte di a anunsiá di drenta merkado “real estate”, aktividatnan riba tereno di Isla ta sero pa lokual ta trata proyektonan dim krudo i di asfalt. Por ehèmpel, e kontrakt entre Global Oil Management i Refineria di Kòrsou, ta obligá Global Oil di paga mensual un suma di mei mion dòler pa hür fasilidatnan riba tereno di Isla. Oryx, kual kompania Refineria di Kòrsou a konfirmá di firma ta un kompania ligá ku e organisashon potente di Qatar Investment Authority, kual organisashon ta manehá e Fondo di Invershon Soberano di Qatar. Te ainda e dos kompanianan a hala tur atenshon di prensa pero riba ehekushon, no a konfirmá nada.

Segun e kontrakt di Global, nan tin derechi riba maneho di fasilidatnan riba tereno na Refineria Isla. Oryx su MOU ta dirigí pa maneho di Refineria Isla lokual por nifiká, posibel negosashon entre Oryx i Global Oil Management di Boca Raton. Aparte di eksportá asfalt pa Estádos Unídos, e sosio  di Refineria di Kòrsou, Global Oil Management Group di Boca Raton, Estádos Unídos, ta dispuesto na eksportá krudo di Kòrsou pa islanan karibense. Esaki ta lo lokual nan konseheronan petrolero Greta Lichtenbaum i David Ribner, a splika e Ofisina di Kontrolaria Aktivonan Internashonal OFAC).  Te ainda, manera publiká na diferente okashon den Vigilante, no tin aktividat. Chèns ta grandi ku Oryx lo purba drenta e merkado klandestino di petroli i uza Bullenbaai komo trampolin, den kasonan ku esei lo permití.

Mas aleu tin un otro problema. Entre PDVSA i Refineria di Kòrsou tin un akuerdo pa kanselá un debe akordá di 450 mion dòler na entrega di produktonan petrolero. Aparte di esei, e kompania venezolano a primintí di depositá  21 mion florin pa kanselá nan debe atrasá serka eks empleadonan i kontratistanan ku tabata traha riba tereno di Isla. Entretantu un aña a traspasá. PDVSA no a kumpli i lo no kumpli tampoko.

Login