Back to Top
Responsive image
E korant di pueblo

Dos aresto grandi na Kòrsou


February 9, 2021 • 1 minüt pa lesa

Zeelandia– Riba djaluna 8 di febrüari 2021 a detené R.L. di 40 aña di edat na Kòrsou pa envolvimentu den un supuesto organisashon kriminal. E detenshon ta parti di e investigashon yamá Themis den kual pa mas ku un aña ta investigando e organisashon aki.

Themis ta un investigashon di echonan kometé den diferente pais den Reino Hulandes i otro pais pafó di esaki. Speshal pa e investigashon aki a forma un tim di reshèrshi ku ta konsistí di miembro di kuerponan polisial di Sint Maarten, Kòrsou, Aruba i tambe e Tim di Koperashon di Reshèrshi (RST). E tim aki ta kai bou di mando di Ministerio Públiko di Sint Maarten i Ministerio Públiko di Kòrsou. Anteriormente den e investigashon aki tabatin detenshon na Kòrsou na luna di novèmber. A detené e sospechoso R.L. den su vehíkulo.

Ta sospech’é di forma parti di un supuesto organisashon kriminal ku ta wòrdu tené responsabel pa diferente asesinato i trafikashon di droga i tambe labamentu di plaka. E sospechoso R.L. tabata hospedá temporalmente na un resòrt na Kòrsou kaminda dia 8 di febrüari 2021 a tene un entrada hudisial den e kamber di hotèl bou di direkshon di hues komisario. Durante próksimo tempunan, e investigashon lo kontinuá. Es ku tin informashon ku por yuda e tim di investigashon por tuma kontakto ku e tim via di e siguiente numbernan di telefòn/Whatsapp: +5999 521 3865 (Kòrsou) òf +1 721 586 5052 (Sint Maarten). Es ku ta preferá di keda anónimo por kompartí informashon dia di e siguiente liña di tep (tambe Whatsapp): +5999 679 2896 (Kòrsou) o +1 721 553 0561 (Sint Maarten).



Login