Detené:  Gregory detené riba 17 mart, nèt un dia despues ku Gobièrnu a lansa su kampana pa entrega arma.

Nieuwe Haven—Korte Penal den Promé Instansha  ayera a trata e kaso di Ministerio Públiko kontra di e hòmber Gregory C. , akusá di tabata den poseshon di arma di kandela riba 17 di mart 2026. E akusado a presentá den korte defendé pa mr. Athena Sulvaran.

Gregory a keda detené despues di un entrada hudisial pa buska arma ilegal. Riba djamars 17 di mart 2026, alrededor di 05.40’or, Tim di Atrako a tene un entrada hudisial na un kas  na Monte Verde enkonekshon ku poseshon arma di kandela.  Durante di e entrada hudisial a haña i konfiská dos (2) pistol, sinku (5) di ‘airsoft’ i tambe munishon.  Na e adrès enkestion polis a detené e hòmber G.D.C. di 55 aña di edat nasé na Kòrsou. A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.

E investigashonnan a sigui ayera den korte bou ouspisio di hues mr.  Foppen. Gregory a atmití poseshon di tur e armanan. Ta trata di dos revòlver cal. 38 di marka Smith & Wesson i Sturm Ruger huntu ku 6  bala i 5 arma di Air Soft. Huntu ku e armanan a logra konfiská tambe un kantidat limitá di hash. Gregory ayera a atmití di tabata den poseshon di tur e armanan. Riba e dia di redada, polis a bin konstatá por lo ménos 8 persona di diferente nashonalidat, na mesun adrès. Tabata trata di hendenan ku tabata hür alokashon serka di Gregory.

Segun e akusado, e tabatin e armanan di kandela bou di su kama den un kluis. Tabata dos arma ku a sirbi pa bòrg pa un fiansa ku e la hasi na un persona latino. Segun Gregory, e la fia e sèn i despues nan a entrega e dos armanan den un saku di papel. E la tuma e armanan i sin wak mes a pone nan den e kluis te riba e dia ku outoridat a drenta su kas. Esei tabata riba 17 di mart, pero riba 16 di mart e mes tabatin intenshon pa bai entrega e armanan di kandela. Pero no a logra yega warda di polis, pasobra su yu tabata malu. Ta asina riba 11 di desèmber 2025, minister di hustisia a tene un rueda di prensa pa tur hende entrega nan arma ilegal.

E pasado di Gregory, nasé riba 12 desèmber 1970, tin un trayekto largu ku hustisia. En total e la pasa mas ku 100 luna, 8 aña, será. Pero lokual ta remarkabel ta e kambio den su bida. Gregory a keda hopi ana sin tabatin kontakto ku hustisia. E tin un kompania di konstrukshon eksitoso i ta ganando 18 mil florin mensual na salario. Su delaster kastigu tabata na 2009.  Fiskal di Ministerio Públiko, Girigoria Hernandez a mustra tambe ku Gregory  a drecha su bida enorme, pero poseshon di arma ta kastigabel. E la hasi un demanda di 15 luna kual 2 kondishonal i 3 aña tempu di prueba.

Su abogado,  Athena Sulvaran a menshoná ku riba 16 di mart, gobièrnu a anunsiá un kampaña nashonal pa tur hende entrega nan arma. Gregory tabatin idea pa riba 17 di mart entrega su arma, pero polis no a duna oportunidat pa esei. E abogado a duda den eskoho di fecha di polis pa nèt un dia despues di anunsiá e kampaña, drenta kas di su kliente. Esei ta nifiká, ku su kliente no a haña oportunidat pa entrega su armanan. Mester tin oportunidat igual, segun Sulvaran i den kaso di su kliente esei no te kaso.  Hues mr. Foppen, aki 1 siman ta duna veredikto.