HOEF—Polis a detené dos hòmber riba sospecho di envolvimentu den atentadonan ku eksplosivo den zomer den kasnan na Midden-Nederland.

Ta trata di hombernan di 36 i 21 aña di Amsterdam. Na yuli polis a registra diferente eksploshonnan den kasnan den provinsianan Utrecht i Noord-Holland. E prome tabata den un kas na Hoef/Haag, un bario den konstrukshon na Vianen. E siguiente anochi tabatin otro eksplosivo den parke Tienhoven, 30 kilometer norte. E wikent despues tabatin un eksploshon na Huizen i fin di yuli atrobe dilanti un kas na Hoef i Haag. Alkalde di Huizen a disidí despues di e eksploshon na e kas den mesun kaya pa sera e kasnan pa motibunan di seguridat. Tabatin peliger pa habitantenan. Tabatin vigilansia di unidatnan spesial di polis den bario. Polis tabata presente ku armanan outomatiko. Anteriormente polis a informa ku ta tene kuenta ku eksplosivonan ta relashoná posiblemente ku un konflikto den mundu di droga. Den investigashon riba e eksplosivonan ya a detené un homber (42) di Den Haag i un dama (33) di Rotterdam. Polis no por a konfirmá ku e sospechosonan aki konose esnan detené ayera. Mas detenshon no ta eskluí.