Back to Top
Vigilante banner image

Dr. Keli: “Despues di 4 siman investigashonnan mester ta kla”


April 26, 2023 • 2 minüt pa lesa

Dr. Keli a bolbe enfatisá ayera ku e trayektonan di investigashon no tin niun pero niun aspekto polítiko.

Willemstad,– Pa loke ta e otro problema na CMC kual ta den e departamentu di kamber di operashon (OK), aki tambe profesor Keli ta splika ku e investigashon lo ta independiente. E ta bisa ku aki tin un aspekto di struktura i un trayekto di akreditashon, paso e pèrmit di CMC mester bai via di JCI pa asina por garantisá e kalidat di kuido.

Den e kuadro aki Keli ta splika ku tin diferente eksigensia  pa e trato na pashènt. Den e kaso aki tin sierto struktura ku mester keda implementá kual ta strukturanan ku tabata eksistí kaba den SEHOS, pero ku a keda modifiká. E ta bisa ku a bini sierto inkietutnan i tin diferente keho tambe riba materia, roster i diferente aspekto ku ta pasa dor di otro. “Pa haña un bista tòg mester hasi investigashon independiente i den esaki lo skucha sindikato, maneho, direktiva ets, pasando den e prosesonan pa wak kon e kalidat di kuido ta ser duna”, asina e direktor di inspekshon a duna di konosé

E ta splika ku pa trese kalidat mester hasi esaki di manera independiente pa wak kiko a pasa i kiko lo mester bai pasa. E proseso ta tuma su tempu i lo duna 4 siman pa yega na konklushon. Durante di e investigashon lo no hasi niun deklarashon na prensa, tin un media stilte, pues lo no tin informashon miéntras ku e investigashon no tèrminá.

E ta bisa ku direktiva lo tuma nota di tur e inkietutnan i lo evaluá tur esakinan den tur e kosnan ku lo mester pasa. “Pues mi ta kere ku esei ta e proseso ku nos ta bai enkaminando i pa e proseso bo mester trese tòg kalidat, Durante di e proseso lo tuma debido kuenta pa ku e kalidat keda garantisá i lo duda pa aktua si esaki ta nesesario promé ku e investigashon tèrminá, pero esaki ta si ta nesesario” pues e profesor Dr. Keli.

E ta bisa ku si bo ta tuma nota ku den un proseso kaminda tin kambionan ku ta toka kalidat di kuido, semper den e proseso aki bo mester tin pa partidonan tur ta riba mesun liña. Pues e situashon di tenshon manera tin awor aki sigur no ta deseabel. Si tin algu ku ta pasa, direktiva ta pidi pa pone nan na altura di manera ku si nan mester aktua, nan ta aktua mesora.

Lo bai papia ku CBV i gerensia na mesun mesa, mesun dia, mesun ora pa no bini dos liña ku ta kana banda di otro , paso esaki no ta bon pa kalidat di kuido. “E investigashonnan no tin ningun aspekto polítiko. I ta un asuntu ku mester tuma lugá i ta un asuntu zùiver i no tin niun agènda su tras”, asina e profesor a tèrminá bisando.

Login