Punda—Miéntras Kòrsou ta luchando ku Covid, den lagunanan di Boka Sami Libu i Blue Bay, veterinario Odette Doest ta luchando pa skapa bida di un kantidat di Flamingo ku ta pegando nan mes den liñanan di piska. Segun e veterinario gobièrnu mester kuminsá pone atenshon na e problemátika.

Siman pasá Vigilante a publiká un relato di un Flamingo ku no a logra su bida, despues ku e deskubrí e para pegá den un bòl di liña di piska. Apesar di a trata na rebibá e bestia, e no a logra alkansá keda na bida. “ Ta hopi lástima wak nan pegá sin por move”, Doest a duna di konosé na Vigilante. E veterinario tin algun tempu ta vigilando e situashon i segun su opinion e kantidat di kasonan ta oumentando. E ta bisa ku e paranan ta mara nan pata den e liñanan di piska ku ta bentá den e lagunanan i nan no por bula bai i ta sofoká muri.  Ta notando e fenómeno den laguna di Boka Sami Libu i tambe den lagunanan artifisial na Blue Bay ta notando Flamingo ku liña di piska na nan pata. No tin instansha òf persona ta tratando na yuda e paranan. Segun Doest mester bini un kampana di konsientisashon pa esnan kende ta bai piska den e lagunanan i laga liña pegá. Esaki ta un molèster serio pa e Flamingonan. E la sigui bisa Vigilante ku e ta risibiendo mas yamada riba e problema i mesora e ta bai yuda esnan ku e por yuda. Pero lástimamente mayoria no ta logra keda na bida.