Kon e palapanan a keda kimá riba 14 di novèmber 2023.

Marí Pampoen,– Apénas 6 luna despues ku CTB a habri e parke rekreativo na Marí Pampoen, algun malechornan deskonosí a sende tres palapa na kandela.

Tabata un suseso ku a keda kondená formalmente dor di henter komunidat lokal. Riba 14 di novèmber 2023, personal di brantwer stashoná na Steenrijk pa presentá ku urgensia na e patio na Marí Pampoen unda algun di e palapanan tabata na kandela.  Polis di Punda i tambe  e pagadónan di kandela ku a yega na e patio na Marí Pampoen a tuma nota di sigur tres palapa ku tabata na kandela. Mesora a kuminsá ku e parti pa asina por a dominá e kandela pero esaki no a evitá ku  tur e tres palapanan a ser destruí pa e kandela. Sigur esaki ta algu di lamentá kon hendenan ku mente maligno ta hinka den nan kabes pa destruí palapanan ku tabata un parti di e bunitesa di e aria na Marí Pampoen.

Ya ta bai hasi kasi 6 luna ku a palapanan a keda kimá i ku apesear ku outoridatnan ta kuminsá nan investigashon pa saka afó ken tabata tras di e kandelanan, ainda ningun persona no a keda detené.

Den un trayekto di kordinashon entre CTB i Ministerio di Desaroyo Ekonómiko, e proseso pa risibí fondo di daño via seguro tabata kana. Despues a kuminsá ku búskeda di oferta pa instalá palapa nobo. I awor e palapanan nobo ta bou di konstrukshon. Na e sitio por nota bèrdat tres palapa nobo ta bai wòrdu konstruí i tambe por nota ku a traha fundeshi nobo pa hinka e palunan aden.

No ta konosí ainda riba ki fecha e konstrukshon lo keda finalisá, pero pronto pueblo por disfrutá di nobo ku su palapanan nobo.

Un kos a bira sigur despues ku e parke di rekreashon na Marie Pampoen a habri pa públiko, kual ta e kantidat di hende ku ta bishitando e parke riba un forma diario. Mayornan ta bai ku nan yu nan pa e kriaturanan hunga, adultonan ta hasi ehersisio den e área destiná i ya kaba diferente persona a tene fiesta den e área nobo.

For di esaki por nota ku demasiado interakshon sosial ta tumando lugá den e parke públiko i esaki por sierto ta un bon desaroyo pa e área. Muchanan di bario tambe ku basta regularidat ta bishitá e área i asina otro muchanan di otro bario tambe ta sera amistat ku konosí nan nobo. Tambe pa usa e fasilidatnan  ta totalmente grátis, pues tur rango di komunidat por bishitá i disfrutá di e parke, kual ta algu balioso pa e sentido di komunidat na Kòrsou.

Ekspertonan urbano riba nivel internashonal tur ta di akuerdo ku parkenan públiko ta esensial. E benefisionan ta inkluí redukshon di krímen, oumentá salubridat públiko i enkurashá ekonomia lokal. Kaminda ántes planifikashon urbano tabata pusha pa tur hende tin nan propio kurá,  awor ta resultado ku planifikashon urbano ta preferá pa traha un parke grandi kaminda un i tur(sin kurá) por disfrutá di dje.