Back to Top
Responsive image
E korant di pueblo

Duda den verbal di Polis ta pone ku pareha detené pa arma deklará liber


May 28, 2021 • 3 minüt pa lesa

Dama ku tambe a keda detené ku tabata den e vehíkulo.

Nieuwe Haven—- Korte ta deklará e hòmber L.G. i e dama I. M. liber, esaki debí ku e prosèsverbal ku e agente polisial nan a traha a trese sierto duda nan kuné. E akusado nan mes no a presentá den sala di korte pero si nan defensa kende tabata abogado mr. Obispo.

Ta trata aki di un kaso ku a tuma lugá dia 8 di Desèmber di aña 2020, den oranan di mèrdia ku polis a bai pa para un vehíkulo di marka Kia Rio. Na momentu ku a duna e shofùr di e vehíkulo aki e òrdu pa para e vehíkulo e no kier a duna oido pa kual a kuminsá ku un persekushon  ku a bin terminá na altura di Lanthùis Hel ku dos detenshon.

Durante di investigashon a sali na kla ku e duo ku tabata den e outo kende tabata un hòmber i un muhé, lo a benta un arma di kandela for di e outo. A konfiská e arma aki di kual tabata un pistol di marka Pietro Baretta. Na e sitio a hasi detenshon di e hòmber L. G. i e dama I. M. unda ku ámbos ta nase na Kòrsou.

Ayera korte a trata kaso kontra di e duo aki unda ku niun di dos akusado no a presentá den sala di korte pa asina por a trata nan kaso, pero nan defensa si tabata tei presente. Durante tratamentu di e kaso fiskal mr.E. Bos a trese dilanti ku e agente polisial nan a indiká ku durante e persekushon  dado momentu lo a bin tuma nota kon un persona lo a tira un arma di kandela for di bentana na altura di Fokkerweg. Mientras ku den e prosèsverbal a indiká ku na momentu ku a kontrolá e outo no tabatin nada robes den e vehíkulo, pero ku tabata un otro patruya ta esun ku a risibí un mèldu di ku a benta un arma for di bentana.

Segun fiskal e no ta mira un pakiko di duda den e prosèsverbal ku a keda traha di e agente polisial nan ku a traha e prosèsverbal. E arma a keda enkontra na momentu ku a bai hasi búskeda i esaki por a keda komprobá. Fiskal a pidi pa liberá e dama for di tur akusashon miéntras ku e akusado G. fiskal a hasi un demanda di 21 luna di prizòn. Segun e abogado di e akusado nan ku su kliente a atmití ku e la hasi fout dor di sigui kore na momentu kua duna e òrdu pa para, pero ku e la hasi esaki paso e no tabata ke a pèrdè su vehíkulo p’esei e la sigui kore.

Segun e abogado su kliente a indiká na dje ku e vehíkulo tabata falta un dokumento i ku si e lo a para nan lo por a kita e outo for di dje. Mirando ku e vehíkulo ta hopi importante pe paso si lo a kita esaki for di dje e lo n o por a sigui traha. Segun e akusado na momentu ku a para e pa kontrolá den e vehíkulo no a bin enkontra nada tabata despues ku a bai warda di polis kuné huntu ku e dama a bisé ku e la wòrdu detené pa arma di kandela. Segun e abogado no sa si lo por konfia e prosèsverbal nan aki debí ku e promé ta bisa ku ta e agente polisial nan tabata esun nan ku a mira kon ta tira e arma di kandela for di bentana, miéntras ku e otro prosèsverbal ta indiká ku tabata un mèldu ku nan a haña e di dos patruya a bin enkontra e arma.

Segun e abogado debí na e duda nan aki e la pidi wes pa por a duna ámbos di su kliente nan libertat. Wes mr. Verbeek a indiká ku si bai wak bon e abogado tin rason, i ku tin sierto duda nan pa loke ta trata e kaso aki i la indiká ku lo e lo no bai skucha e agente nan ku a hèndel e kaso aki. Wes a deklará ámbos akusado liber for di tur akusashon.

Login