Informá bo mes i stòp di propagá informashon inkorekto.

PUNDA- Diariamente nos tur ta keda eksponé na un gran kantidat di informashon tokante e vírus di Covid-19 i bakunashon. No ta tur informashon ta informashon korekto i konfiabel.

For di komienso di e trayekto di bakunashon na Kòrsou, diferente hende a duna nan opinion tokante e bakuna kontra Covid-19 riba plataformanan di ret sosial. Mundialmente diferente teorianan konspirativo ta sirkulá, kual ta pone hende duda den e seguridat i efektividat di e bakuna kontra e vírus ku a buta mundu kompletu kabes abou.

Un di e opstákulonan mas grandi pa tuma e bakuna di Covid-19 ta ku tin spekulashon ku e bakuna ta kontené supstansianan peligroso. Gruponan anti-bakuna a duna di opinion ku e bakuna kontra Covid-19 ta peligroso paso e ta kontené e supstansia ‘formaldehyde’. En bèrdat ta konosí ku e supstansia aki ta peligroso den konsentrashonnan haltu. Kontrario di loke e grupo anti-bakuna ta bisa, e konsentrashon di ‘formaldehyde’ den e bakuna di Covid-19 ta sumamente abou i no ta yega e montante nesesario pa e ta peligroso den nos kurpa. Ta importante pa sa tambe ku e kurpa humano mes ta produsí un kantidat chikí di e supstansia di ‘formaldehyde’ aki i tambe nos kurpa por kibra e supstansia aki relativamente bon. Ademas, tur bakuna ku superá ensayonan sientífiko riba hende ya a keda pruebá kaba riba seguridat pa asina ta sigur ku tur kontenido di e bakuna seif. Mayoria di e supstansianan den un bakuna ta di kantidat asina abou ku nan no ta forma ningun peliger pa bida di hende.

Un di dos mito ku ta sirkulá ta ku e bakunanan, ku ta usa e teknologia di mRNA, ta kambia e kódigo genétiko di hende. Manera ya ta konosí e bakunanan ku nos ta usa aki na Kòrsou (Pfizer/BioNTech i Moderna) ta kontené mRNA, kual ta un fragmento di e kódigo genétiko di e vírus. Nos kurpa ta usa mRNA regularmente pa produsí proteina. Bakunanan basá riba teknologia di mRNA ta produsí proteina viral ku ta inofensivo pa nos, pero ku ta aktua komo un ensayo general pa nos sistema imunológiko por siña rekonosé e vírus i traha antikuerpo pa protehá nos kontra di e vírus.

E tipo di bakuna aki no por inkorporá den nos kódigo genétiko. Ta simplemente un proseso ku no ta posibel den nos kurpa. E kurpa humano tin DNA komo kódigo genétiko, for di esaki nos por traha e asina yama mRNA (messenger RNA) pa produsí proteina. Nos kurpa humano no ta kontené un método pa bòltu e proseso aki bek, pa bai di RNA na DNA. Pues sientífikamente no ta posibel ku e bakuna ta kambia nos kódigo genétiko paso mRNA no por kombiná ku DNA i afektá esaki.

Un di tres ponensia ku e grupo anti-bakuna tin kontra bakuna di Covid-19 ta ta bisa ku imunidat ku ta wòrdu krea despues di infekshon ku un malesa ta superior na imunidat krea dor di un bakuna. E ponensia aki ta un mito ku tin años ta sirkulá mundialmente, for di ora a kuminsá ku implementashon di bakuna kontra malesanan manera sende paga, sarampi i grip. E malesanan ku tin bakuna kontra dje, ta malesanan ku tin konsekuensia real, pa tèrmino largu i ku por ta fatal pa hende. Pues pa warda pa bo kurpa mes traha antikuerpo ora bo keda infektá pa e vírus di Covid-19 no ta un strategia sin riesgo severo pa salú. Dor di no bakuná ta pèrmití e vírus di keda rondia den nos populashon, esaki ta resultá den mas morto, mas hospitalisashon i mas kuido pa manehá konsekuensianan a lo largo di e malesa di Covid-19.

Otro di e teorianan konspirativo ku ta wòrdu usa kontra Covid-19 ta ku uso di konofló ta protehá kontra di e vírus. Realidat ta ku konofló, meskos ku hopi otro alimento, ta salú i por kontené propiedatnan ku ta yuda nos sistema imunológiko. Sinembargo, no tin ningun evidensia sientífiko ku konofló ta protehá kontra e brote aktual aki di Covid-19. Pues pa kere esaki i keda sin bakuná, ta un riesgo haltu pa salú di hende sabiendo e konsekuensianan severo ku e vírus aki ta trese kuné.