WILLEMSTAD,—-Despues di hopi esfuerso e pesebre di mas grandi den área di Montaña banda ariba i bisindario lo tei tòg e aña aki pa pueblo di Kòrsou i komunidat por bin disfrutá un biaha mas di dje.

Mirando ku aña pasá e organismo di TEQA a kumpli 20 aña ku nan ta kreando e obra grandi i bunita aki den e bario di Montaña Banda Ariba i bisindario.  E pakiko ku nan kier a wanta kuné ta debí na kondishon di salú di e kreadó prinsipal i tambe pa falta di fondo a pone ku nan a tuma esaki komo desishon pa wanta ku e pesebre. Pero mirando kon grandi e akohida ta pa tantu bishitante nan lokal i turistanan tòg e pesebre lo sigui tei pa pueblo por bin disfrutá di dje manera ya ta e tradishon.

Mirando ku su eksistensia ta di gran balor den e temporada di Pasku i fin di aña. No pa e echo ku e ta un pesebre, sino e ta krea kompletamente ku materialnan resiklá i tambe ku su animalnan bibu i real aden. E organisashon di TEQA ku ta pará pa : The Excellence Quality Art a disidí ku nan lo sigui traha e pesebre aki.

Pero esaki por bira realidat ku bo(so) sosten pa kontribuí ku bo(so) granito na e organisashon di TEQA i hóbennan di e organisashon aki ku e lokual ku abo por manera: materialnan ku ya abo lo no bolbe usa di e temporada, ròl di papel maron pa yuda konstruí e pesebre, lus i iluminashon pa esaki por sigui bria i iluminá e temporada di fin di aña aki. Abo ku ke duna bo kontribushon por tene kontakto ku organisashon TEQA na number di telefòn: 694-3116 pa medio di un whats app òf por depositá bo granito na number di kuenta: MCB :325 428 03

E hóbennan di organisashon TEQA lo sende e lusnan di e pesebre pa e fin di siman aki. E pesebre ta keda situá na kaya Kané #1 (hanchi pabou di langulé). Manera semper abo komo bishitante tin mag di yega serka pa baha i saka potrèt i tuma splikashon kon tur kos a keda hinka den otro i asina por tira algu di bo grasia den e buzon di e organisashon pa asina nan por sigui ku aktividatnan noble manera esaki,di akinan organisashon TEQA  The Excellence Quality Art ke deseá pueblo di Kòrsou un dushi temporada di Pasku i fin aña ku hopi dicha, suerte i prosperidat.