Agente polisial Mariano a presentá ayera den un sala di korte basta bashí.

Nieuwe Haven: Ayera e èks polis Mariens Mariano, ku a keda detené riba 22 di yanüari komo sospechoso den kaso di 600 kilo a presentá dilanti korte.  Mariano ta keda konsiderá komo e  “brain” tras di e robo di 600 kilo na warda di polis Rio Canario durante e marduga di 13 pa 14 di òktober 2018. Dia 17 di mart último, Mariano a keda transladá di un forma silensioso pa Kòrsou.

Na total, ofisialmente tin 4 akusashon kontra di Mariano. Mariano ta keda akusá di no a entregá su uniform di polis i arma reglamentario dia el a entregá su retiro na kuerpo polisial. Tambe e ta keda akusá pa su envolvimentu den un lote di 340 kilo di kokaïna ku a keda interseptá dia 15 di sèptèmber 2018 den area di Fuik. E sospecho ta grandi ku despues ku e droga aki a keda konfiská, e doñonan di e droga a pone preshon riba Mariano pa bai kue esaki bèk.

E dos último akusashonnan tin di haber ku e robo di e 600 kilo i e benta/negosashonnan ku tabatin den e periodo despues ku e droga a keda hòrtá.

E kaso pro – forma di Mariano a kana basta trankil. E mes no a bisa nada ayera den sala di korte. Mariano ta keda representá pa abogado mr. A.Sulvaran.

Kontrali na loke hopi hende a pensa, sala di korte tabata basta bashí ayera. Esaki ta kontrali na lokual a kustumbrá kuné ora un agente polisial ta keda akusá di un delito di tal magnitut. Normal, hopi agente polisial ta presentá den sala di korte pa sigui e kaso òf duna nan sósten na nan kolega pero ayera esaki no tabata e kaso. Bo korant Vigilante por a tuma nota di solamente dos rishèrshi ku a hasi akto di presensia den e sala. Pa loke ta trata prensa tambe, no tabatin hopi manera ta kustumbrá ora ta trata kasonan asina ki.