Back to Top
Vigilante banner image

E intenshon ta pa por logra haña un nivel di inmunidat den nos komunidat


February 19, 2021 • 2 minüt pa lesa

Willemstad,– Durante rueda di prensa ayera señora Zita Jesus Leito Minister di Salubridat, Medio ambiente i Naturalesa a splika ku manera tur hende por a tuma nota e promé vakunanan a yega riba un buelo di KLM i e tabata presente pa a risibí e vakunanan aki i e ta hopi agradesido di ta asina leu pa ofresé pueblo un solushon pa loke ta trata e guera kontra Cobvid-19.

E ta bisa ku e tim ku ta kana e trayekto aki ta hasiendo e último aktividatnan pa kuminsá ku e vakunashon.

Tambe señora Jesus Leito ta bisa ku pa loke ta trata palabrashonnan den reunion, a kana un kaminda largu. E ta sigui bisa ku for di inisio ku Kòrsou ta den e pandemia aki a traha huntu ku Hulanda i otro islanan pa asina tene nos isla safe. Segun Zita den asuntu di vakunashon tambe nos ta forma parti di hinter e trayekto ku Hulanda.

“Algun luna pasa Hulanda a duna di konosé ku nan lo proveé vakuna pa hinter reino, i finalmente el a  bira realidat i nos lo sigui riba e kaminda ei. E intenshon ta pa hinter poblashon di 18 aña i mas haña vakunashon di tal moda ku nos por logra pa  haña un nivel di inmunidat den nos komunidat. Habitantenan di reino, tur a haña e mesun trato i esaki ta sumamente importante” Asina minister di salubridat Zita Jesus Leito a duna di konosé.

E ta enfatisá ku nos ta forma parti di e promé paisnan di Karibe ku tin akseso na vakuna. E ta splika ku esaki no ta solamente di importansia pa nos salu, pero tambe importansia di nos ekonomia. Pa hopi tempu kaba nos ta biba bou di sierto restrikshon i esaki lo pone ku nos lo por biba mas norma riba nos isla.

Login