Back to Top
Responsive image
E korant di pueblo

E kosecha di Guus Hiddinh ta hopi pober pero no tin motibu di paniko (Ainda)


March 10, 2021 • 3 minüt pa lesa

E kosecha di Guus ta basta pober te ainda.

Willemstad——Tur hende a spera ku rason, ku Hiddink ku su nòmber lo a atraé mas hungadó di nivel pa nos. Esei segun e lista ku a sali ayera pa e weganan kontra Sint Vincent i Cuba, sigur no ta e kaso. Dos hungadó ku por wòrdu konta komo refuerso so a aparesé komo nòmber nobo. Vernon Anita i Anthony van den Hurk, di kual sigur Anita, no ta Hiddink a trese, pero ta deseo di Anita mes di hopi tempu.

E lista ta enserá hasta hungadó ku no a hunga riba e nivel máksimo i ku ta sin ekipo pa hopi tempu, manera Suently Alberto i Shermaine Martina kendenan tin nuebe luna sin klup òf hungadó ku ta hunga riba e di kuater nivel na Alemania manera Roshon van Eijma. Esaki aparte di e hungadónan di nivel ku tampoko tin klup manera Cuco Martina i Roly Bonevacia, pero ku pa nan nivel no por wòrdu deskartá. E lista aki sigur no ta mas fuerte ku e selekshon di Remko Bicentini, ku pa motibunan konosí mester a wòrdu kambia komo tékniko. E ousensia di pilarnan manera Darryl Lachman i Brandley Kuwas, ainda por wòrdu kompensá den e promé buèlta aki. Tin bon notisia tambe. Di mes Vurnon Anita (RKC) ta un tremendo atkisishon. Anthony van den Hurk ku ta hunga na Suesia pa Helsingborg den divishon máksimo, ta un goliadó nato.

Bon notisia ta tambe ku Michael Maria porfin a haña un klup den NAC di Breda ku ta luchando pa subi Eredivisie. Ku Michael nos ta sera e pia di half riba ala robes ku tabata un preokupashon. Nos a bisa semper ku si Hiddink ku su nòmber no trese hungadó di klase pa nos, ta sèn pèrdí i lo ta mihó pa kontratá na tempu un entrenadó mas hóben ku ta un futbolista renombrá ku pa su edat por relatá i interkambiá mas mihó ku futbolistanan aktivo. Na Hulanda mes ta yen, manera entre otro Clarence Seedorf, Aaron Winter, Mark van Bommel, Michael Reiziger òf hasta Frank Rijkaard. No por eksigí di Hiddink ku su 75 aña lo move rònt Hulanda òf Europa pa papia personalmente ku e hungadónan. Lokual si mester sosodé. Di tur manera nos por ta optimista pa e promé buèlta aki, pero si no bin refuerso despues di e  promé buèlta, nos no ta bai por ku e selekshonnan tòp di CONCACAF i lo bai kai kòrtiku.

Un problema chikí ta ku Lachman lo hasi falta, pasobra no tin bèk sentral di nivel den e selekshon aki, ku eksepshon di Cuco Martina ku tin nuebe luna sin klup, pero ku ta train ku RKC i pa e nivel di e kontrinkantenan den e promé buèlta aki, mester por ta un di e dos defensanan sentral. E mihó opshon ta pa hala Leandro Bacuna un linea atras pa forma e duo sentral ku Cuco. Ku Gaarie ku no ta regular den RKC i Maria nos ta sera e pia di halfnan. Ku  Anita i Juninho Bacuna sentral den un bolante di 4, nos ta fuerte mei mei di tereno. Kenji Gorré ku ta hunga den e liga máksimo esta primeira liga di Portugal,  Jarchinio Antonia (Cambuur) i Roly Bonevacia por lucha pa e dos puestonan riba ala. Jeremy Antonisse (Jong PSV) ta un hóben talento ku tambe por haña pida. E tambe por hunga riba ala den atake. Pa e dos puestonan den atake, ku Anthony van den Hurk, Charlison Benschop i Rangelo Janga, e eskoho ta hopi pareu. Téknikamente van den Hurk ta superior, pero  Benschop ku Janga tin mas estatura pa krus’é. E selekshon ainda ta trese hopi eksperensia di Eredivisie i di Premier League kombina riba tereno i riba papel mester por vense e number 168 Sint Vincent, e number 180 Cuba, e number 208 Islanan Birgen Britaniko i e number 130 riba lista di FIFA ku ta Guatemela.

Komo number 76 riba e lista mundial i komo kampion di Karibe nos ta obligá pa gana. E banki ku eksepshon di ‘Sontje’ Hooi i Jeremy de Nooijer kendenan ámbos ta hunga riba di dos nivel na Qatar no ta mustra masha fuerte. Gevaro Nepomuceno tambe por yuda na diferente posishon si e ta den forma. Un ousente ta Jafar Arias ku tin un bon temporada ku VVV den Eredivisie, apesar di no ta estelar den tur wega. E motibu no ta konosí. Ke men e lista ta un desapunto, pero di otro banda e grupo C aki no ta mustra fuerte i nos mester tin konfiansa ku ‘Pantera Negra’ lo pasa e buèlta aki i lo bai reforsando na kaminda, promé ku nos topa e grandinan di CONCACAF. Personalmente mi ta kere ku e ‘bada bada’ ku tabata tin den e kambio di Bicentini pa Hiddink a afekta nos imágen komo selekshon, pasobra e la wòrdu trese den prensa deportivo ulandes komo algu tur brua. Laga nos spera ku nos ta siña di nos erornan.

Login