WILLEMSTAD,—-Ayera den oranan di mainta Vigilante Farándula a haña un informashon ku, pa promé ku e wikènt aki yega e músiko i kantantenan ku a presentá den “Tumba Revival Festival”, ku a tuma lugá dia 12 di febrüari tras di lomba den Curaçao Festival Center, ta bai haña nan pago.

Manera ku e informashon a bira konosí serka Vigilante Farándula, mes ora a drenta den kontakto ku Manfred “Feko” Gomes i a bisé di e informashon risibí, esaki ta loke ku “Feko” a duna di konosé na Vigilante Farándula.

“Lagami bisabu asina aki, mi a keda poné na altura ku enbèrdat den e dianan aki e músikonan ku a presentá den “Tumba Revival” ta haña nan pago, mi ta hopi kontentu ku porfin e músikonan ta bai haña nan pago. Mi ke pone esaki bon kla, ku e asuntu di pago no tabata den man di A.M.A.K., pero esaki tabata den man di Sektor di Kultura di Kòrsou”.

“Tambe mi ker bisabu ku, A.M.A.K. a primi hopi duru tur e dianan ku ta tras di lomba riba Gobièrnu di Kòrsou, i tambe Minister Steven Croes pa asina yega na un solushon mas lihé ku ta posibel, i mi mester bisa ku Minister Steven Croes no a drumi na ningun momentu so, el a hasi tur kos di su parti, i esaki mi persona ta hopi agradesido na dje. Pues manera ku mi a ser informá, den e dia nan aki e músikonan ta bai risibí nan pago”.