WILLEMSTAD,—-Ya pa basta dia kaba Vigilante Farándula a haña informashon,ku Ephrem J ta den studio di grabashon i Vigilante Farándula a siguí e desaroyo nan ku wowo di falki pa asina mira kiko ta e sorpresa nan ku e artista internashonal tin pa bin kaya kuné. 

T’asina ku Vigilante Farándula a logra haña e informashon kayente, i esaki  ku Ephrem J tabata den studio di grabashon ku e popular “Grupo Extra”, konosí pa nan éksito nan mundial manera “Me Emborracharé” , “Hoy Se Bebe”, “Atravez del vaso” entre otro grandi éksito nan ku a zona ku bastante regularidat na nos emisora nan na Kòrsou i Latino America. 

E kansion aki ta programa pa sali fin di luna di mei. Vigilante Farándula a drenta den kontakto ku e kantante kompositor Internashonal Ephrem J, i a puntr’é kiko tin di bèrdat ku el a kaba di graba un piesa nobo huntu ku “Grupo Extra”, e artista internashonal a duna lo siguiente di konosé.

“Mi a trata na tur manera pa e informashon aki, keda skondí te na momentu ku tur kos ta kla, pero manera semper bo ta un periodista di farándula ku no ta drumi riba e informashon nan. Ta bèrdat mi a kaba di graba ku “Grupo Extra”, titulo di e piesa ta “Còmo Puedes”, e piesa nobo lo ta riba merkado pa fin di luna aki, tambe mi ke bisabu ku, mi tin plan nan grandi na kaminda, ora ku tur esaki nan ta rònt lo mi bisabu di nan”.

Vigilante Farándula sa ku e piesa nobo aki tambe lo bira un éksito mas di Ephrem J, ku semper ta sorprendé tur hende ku kansion nan riba un level haltu, i esaki sigur lo no ta un eksepshon. Mirando ku ta trata aki di un artista ku semper ta para pa kalidat na momentu ku e drenta den studio di grabashon.