For di Aprel te ainda ta daño so desishon di gobièrnu a kousa sektor privá mièntras sektor públiko, inkluso ministernan ta kobra normal tur luna. Ta pa di dos biaha, ministernan den bachi ta para dilanti kámara na Fòrti ordená sektor privá sera negoshi pasobra nan ta un peliger pa derame di Covid!
Aparte di tin dr Izzy Gerstenbluth komo nan èrment di empoderá nan desishonnan awor nan ta uza un di dos èrment via e Lei di Emergensha. Sektor privá a entregá tur kos kaba i no tin nada mas pa entregá. Sektor públiko (inkluso ministernan) te ainda ta bringando un desishon di entregá, pero sektor privá tin 9 luna den bentaha.
Hulanda a fia gobièrnu di Kòrsou kasi mil mion florin durante 2020, pasobra nan entrada di impuesto a baha. Parti di e sèn aki a bai pa finansiá gastunan di gobièrnu (inkluso pago di NOW). E gastunan di gobièrnu ta enserá tambe finansiamentu di salarionan (entre nan di Gerstenbluth i ministernan). Pero kontrali na sektor privá e sektor públiko no ta paga bèk.
Por ehèmpel, kompanianan privá por haña supsidio di NOW, pero mester sigui paga nan impuestonan. Pa ta mas fasil, gobièrnu Hulandes ta duna gobièrnu di Kòrsou sèn pa yuda komersio, komersio ta tuma e sèn i paga su impuestonan kuné. Relativamente, e sen ku gobièrnu di Kòrsou ta haña serka Hulanda ta bini bek den kaha momento komersio di Kòrsou, sektor privá paga bèk. E ta fia sektor privá e sèn pa “un ratu” i ta risibi esaki bèk den kaha via impuesto. En realidat, sektor públiko no ta entregando nada i ta sigui haña sèn tantu serka Hulanda komo serka sektor privá pa por sigui finansia entre otro salario di ministernan.
I ta mesun ministernan ta para den bachi i via un epidemiólogo i Lei di Emergensha ta sigui kòrta den empleo i saku di sektor privá. E minister ta kobra tur luna. I tambe tur esnan dependiente di e sèn ku Hulanda ta fia Kòrsou..Pero esnan kende ta pèrdè nan empleo mester “wak kon tei kobra” pa kria famia.
En realidat Kòrsou no ta den un esfuerso kolektivo sino un esfuerso sostené pa sektor privá. P’esei ta fásil pa un minister den tur trankilidat por bisa den mikrófóno pa sera negoshi i na mesun momento bisa tambe ku “nos mester kuida otro”, pasobra mièntras nos ta kuidando otro serando negoshi na Kòrsou, su salario ta subi kuenta tur luna.