Willemstad – Departamento di Reibeweis ta informá ku entrante 8 di aprel 2024, registrashon a habri pa tur studiante ku ke pasa nan èksamen pa reibeweis promé ku nan bai studia den eksterior.

Tur studiante ku ta bai studia pafó di Kòrsou den e aña eskolar benidero i ke pasa nan èksamen di reibeweis, mester registrá via e-mail na e Departamento di Reibeweis. Na momento di registrashon, tur studiante interesá mester a kumpli 18 aña kaba.

Último dia pa registrá ta djabièrnè, 14 di yüni 2024, via di e-mail serka Departamento di Reibeweis.

E e-mailadrès ku studiantenan por registrá ta: [email protected]. Huntu ku e registrashon mester manda un kopia di identifikashon bálido di e studiante i tambe prueba di su petishon na Stichting Studiefinanciering Curaçao (SSC) òf otro instansha ku ta enkargá ku studiantenan ku ta bai studia den eksterior. Esaki mester indiká ku e ta studiante ku ta bai studia den eksterior e aña di estudio 2024/2025. Studiantenan ku ta bai studia den eksterior, sin aporte di SSC, mester tin un deklarashon di skol aktual.

Ta pidi tur studiante ku ta kla pa èksamen pa tuma kontakto ku nan instruktor pa esaki por pasa na Departamento di Reibeweis i reservá e fechanan sea pa theoria i/o práktiko. Departamento di Reibeweis tin e fechanan disponibel reservá pa e studiantenan den e lunanan di yüni i yüli 2024. No warda te na último momentu pa pasa èksamen.
Pa mas informashon por tuma kontakto via number di telefòn 736-2929 òf manda un mail na [email protected].