E diferente hóben karatekanan ku a kompetí.
WILLEMSTAD—Resientemente Cukarbo a presentá un espektákulo emoshonante di habilidat i kompetensia durante e kampionatonan di karate “ABCS habrí”, ku a tuma lugá den Johan Cruyff Court na Mon Repos.
Un ke otro ku invitadonan speshal den personanan di Carmelita Reeberg, eks-sekretario/visepresidente di Federashon Karate di Hulanda i enkargá ku e portafolio di Topsport Kumite, i tambe John Reeberg, èks- kampion mundial ku e tim di Hulanda, ku ademas tabata 5 biaha kampion di Oropa, 20 biaha kampion di Hulanda i ganadó di hopi premionan di estilo, kende tabatin e honor pa liderá e entrega di premio.
E torneo a ofresé un kombinashon di habilidat i kompetensia, ku a inkluí tantu e disiplinanan di Kata komo Kumite, ku a konta ku un nivel haltu di partisipantenan den 9 kategoria pa Kata i 15 kategoria pa Kumite.
E klímaks di e kompetensia tabata e pelea final pa e titulo den e kategoria “Senior Habrí”, den kua Damir Francisco for di Kòrsou a enfrentá Everon Vrutaal for di Boneiru. Finalmente tabata Vrutaal ku a kapturá e medaya di oro. Ademas di Aruba, Boneiru i Kòrsou, e tim di Sürnam tambe tabata presente.
E kampionatonan aki a sirbi tambe komo un momentu importante pa evaluá e nivel di nos karatekanan ku ta den preparashon ku mira riba e kampionatonan Sento- Amerikano i Karibe ku lo tuma lugá di 18 pa 24 di mart próksimo, na Managua, Nicaragua.