Back to Top
Vigilante banner image

Eksitoso MasterClass Sklabitut i Reparashon den Karibe


April 12, 2023 • 2 minüt pa lesa

Asistensha: e públiko ku a duna asistensha na e masterclass.

Sta Maria– Djárason dia 5 di aprel a tuma lugá apertura i komienso di e kurso maestro, e masterclass di Komishon pa Konmemorá 160 aña di abolishon di sklabitut.

Ku e kurso akí e komishon ke duna formashon i informashon na públiko tokante sklabitut i reparashon pa konsientisá i motivá partisipante pa forma parti di un konmemorashon digno i respetuoso di konmemorashon di 160 aña di abolishon di sklabitut.

E kurso ta den lus di e proseso di emansipashon dirigí riba de-kolonisashon i reparashon. Registrá pa partisipá grátis na e siguiente kurso djasabra 15 di aprel di 10’or di mainta pa 12’or di mèrdia, presentá pa sra. Christel Monsanto. E promé lektura tabata na enkargo di e konosido prof. dr. Verene Shepherd ku ta i a presidí diferente komishon importante di Nashonnan Uní i ta traha tambe na UWI (University of the West Indies).

Na tur un total di 90 persona a partisipá na e kurso reparti den oula di Universidat di Kòrsou i online via livestreaming i por lo ménos 323 persona a wak e video ku presentashon despues. E oudiensia tabata diverso i loke a hala atenshon ta e kantidat di persona di Aruba i di Bándabou ku a partisipá. Apertura di e kurso tabata na enkargo di sra. Lisette Sambo-Velder ku a representá minister di Enseñansa, Siensia, Kultura i Deporte (ESKD). Den su diskurso el a aksentuá e konsekuensianan di sklabitut i kolonialismo ku te ainda ta hopi visibel den nos komunidat. El a mustra riba e plan di dies punto di e komishon di CARICOM pa reparashon ku a eksigí di e paisnan kolonisadó i èks kolonisadó reparashon dirigí riba desaroyo di nan pais- i komunidatnan. Den e direkshon ei Kòrsou lo mester bai eksigiendo reparashon dirigí riba desaroyo di nos pais riba terenonan ku a keda atras òf a kai atras pa motibu di sklabitut i kolonialismo.

Prof. dr. Verene Shepherd na un manera kla a splika kiko ta reparashon i di kon e paisnan ta eksigí reparashon.  Reparashon mester kita e efektonan largu di un maldat òf krímen kometé for di riba e víktimanan di esaki i nan desendientenan. El a trese dilanti ku no tin niun lei internashonal ku ta impedí desendientenan di reklamá reparashon na nòmber di nan ansestronan. E motibu pa eksigí reparashon ta hustamente e impakto di sklabitut i kolonialismo riba nos ansestronan i e konsekuensianan ku nos ta eksperensiá awe.  Reparashon mester tuma lugá pa motibu di:

– Kaptura, benta i realokashon forsá di Afrikanonan. – Práktika di sklabitut ku esklabo komo poseshon i no komo persona ku derecho di hende durante siglonan ku pa Afrikanonan ku a keda atras ta e Ma”afa e tragedia grandi – Mata i kastigá kruelmente esnan ku resistí, inkluso héroenan hòmber i muhé – Emansipashon inhustu sin kompensashon pa esnan ku   tabata sklavisá pero si pa e shonnan – Akshonnan inhustu den periodo despues di sklabitut i kolonialismo ku entre otro a kondusí na lantamentu – Independensia sin pakete di desaroyo – Reparashon pa tragedia grandi ku barkunan di esklabo riba laman. P.e. De Leusden, kaminda mas ku 700 hende a hoga será den bodega di e barku i e barku ZONG kaminda e tripulante a tira 142 esklabo den laman grandi pa skapa awa pa despues kobra seguro pa karga perdí.  – Reparashon pa krímen kometé kontra tur e luchadónan pa libertat, entre otro Tula, Bussa, Cuffee, Quamina.

Login