WILLEMSTAD — Den buki di derecho sivil di Kòrsou ta stipulá ku un matrimonio por ser kontraé únikamente entre un hende hòmber i un hende muhé. Den su veredikto di 13 di sèptèmber 2021 Korte di Promé Instansha a disidí ku e determinashon aki ta bai kontra e prinsipio di igualdat i prohibishon di diskriminashon registrá den artíkulo 3 di Areglo di Estado (konstitushon di Kòrsou).

Segun korte no ta eksistí hustifikashon pa ninga matrimonio sivil na parehanan di mesun sekso, sigur ora no tin sistema legal komparabel manera un relashon di pareha registrá. Den e veredikto korte a para ketu na e kresementu di akseptashon sosial pa loke ta trata relashonnan afektivo entre hende hòmber ku hende hòmber i hende muhé ku hende muhé. Esaki ta sosodé mundialmente, tambe den nos region i na Kòrsou. Korte a mustra riba e posibilidat pa personanan di e mesun sekso kontraé matrimonio den paisnan manera Colombia, Brasil, Argentina, Méksiko, Boneiru i tambe na Florida. Korte a elaborá ku ta e legislador ta disidí si ta tuma e medidanan deseá pa por anulá e diskriminashon ilísito