Lilo Sulvaran: a sirbi komo fasilitado durante e enkuentro, unda e la enfatisá pa komunikadonan profeshonal apliká téknikanan di periodismo pa mihó efektividat.

Sambil—Un grupo di ekspertonan den komunikashon na Kòrsou a tene un seshon di konsulta na KONTENTU Studios na Sambil. Representantenan di MCB, CMC, CBCS, Ministerio Públiko OM, Hustisia, Instituto di idioma i FFK Kòrsou, a interkambiá riba komunikashon mediante aplikashon di strategia riba multi media.

Rònt mundu i na Kòrsou tambe, ekspertonan den Komunikashon Stratégiko ta ampliando nan konosementu riba produkshon di kontenido (den e kaso aki storytelling). Pero alabes ta importante pa e ekspertonan realisá e importansha den sostené un relashon estrecho ku periodistanan pa yuda nan den desaroyo pa apliká èrmèntnan den periodismo.

Kambionan den plataformanan pa karga kontenido ta un proseso di kambio kontinuo unda produkshon di kontenido mester tene kuenta riba diferente destinashon posibel (multi media). Korporativonan Komersial, Estatal i Sosial ta konfrontá e obligashon di uza komponentenan  diferente awor ku e paisahe digital dia pa dia ta akapará mas merkado riba esnan tradishonal.

___________________________________________________________________

Komunikadonan Stratégiko mester apliká téknikanan di periodismo

Sambil– Na Kòrsou ta importante pa e profeshonalnan den komunikashon ta na altura kiko ta pasando den kambernan di redakshon, tantu lokal komo internashonal.

Por ehèmpel na Kòrsou tin un ansiedat menasante den tur kamber di redakshon miéntras e kantidat di miembronan den e redakshonnan ta disminuí. Aparte di esei, despues di Covid, tabatin efektonan negativo riba prensa internashonal unda Kòrsou a sinti e mesun efektonan. Medionan di Komunikashon na Kòrsou a bira mas konsiente i kritiko riba nan espasionan disponibel por ehèmpel ta limitá publikashon di komunikadonan “grátis”.

Germain Gibbs CMC

A keda konstatá durante e enkuentro ku Komunikadonan Stratégiko, tantu den sektor priva komo di gobièrnu òf sosial, mester kuminsá apliká téknikanan di periodismo pa  nan kontenido por yega e destinashon. Asina nan mester komprondé kon pa skibi titularnan i desaroyá kontenido interesante pa nan klientenan.  Ta importante pa nan Maneho di Komunikashon Stratégiko por krea un posishon kompetitivo i sostenibel dor di apliká tres strategia genériko:  1 Enfoke 2. Kosto Abou i finalmente 3. Diferenshá. Mester buska sosten di por ehèmpel bon fotografia, bon vidio i titularnan kòrtiko.

E profeshonalnan den sala a atmití tambe ku e desaroyo digital di komunikashon ta bayendo lihé i nan organisashonnan mester adaptá.

___________________________________________________________________

Bista vertikal ta krea mihó demanda riba media sosial

Sambil—Ayera mainta durante un enkuentro entre KONTENTU Communications i profeshonalnan den Komunikashon Stratégiko na Kòrsou, a diskutí e desaroyo riba ret sosial, si un kontenido visual mester bai vertikal òf horizontal.

Dos hóben eksperto na KONTENTU, Gyadisha Sulvaran i Quincy Conradus a kontribuí i deliberá ku ekspertonan lokal den komunikashon riba e forma di presentá i publiká riba plataformanan sosial. Sulvaran a presentá e diferente formanan kon Kontenido di Merkadeo por subi plataformanan nobo mediante un matrix utilisá na KONTENTU. Conradus di su parto a mustra ta dikon kontenido oudio visual publiká den forma vertikal tin mihó chèns di kobertura.