Back to Top
Vigilante banner image

Elvis Andrade a entregá keho kontra promé minister i Gabinete Pisas


January 21, 2023 • 2 minüt pa lesa

Andrade a bisa ayera ku promé minister Gilmar Pisas ta gaña masha hopi mes.

WILLEMSTAD,– Lider di partido Union Progreso a entregá un keho na Lands Recherche kontra promé minister Gilmar Pisas i sobra ministernan di e aktual gabinete paso Andrade ta splika ku no por ta asina ku komo bon yu di Kòrsou e por pèrmití un gobièrnu ku mester manehá pais ta kue e refineria i manera hasi manera ta di nan e ta. Andrade ta bisa ku masha dia ta trahando riba e keho i ayera tabata e dia paso e kos a bira manera un toko den toko.

A manda e mail pa señor Heiko De Jong for di siman pasa i ayera a hiba e keho pa Landsrecherche . Ayera Andrade a bisa medionan di komunikashon ku tabata presente, ku e keho a ser entregá na nòmber di su partido Union i Progreso i ku ta masha dia nan a bisa ku nan lo entrega un keho, pero a warda pa e momento oportuno.

E kehonan ku Andrade a entregá tin di haber ku Refineria di Kòrsou mirando ku promé minister di Kòrsou segun Andrade ta gaña masha hopi mes, entre otro e ta bisa ku e no sa di e dokumentonan falsifiká, siendo NFI di Hulanda a manda bisa bon kla ku tin papelnan falsifiká.

De pasado Andrade a yega di duna keho kontra diferente polítiko di kual tin di nan ku a duna fruta i p’esei mes e ta bisa ku e ta duna keho kaminda e ta mira ku e por yuda su pais i no pa buska popularidat.

“Kòrsou no tin espasio mas pa drenta polítika pa yena saku ku fondonan públiko di pais”, asina e lider di partido Union i Progreso a bisá prensa ayera tardi dilanti di ofisina di Landsrecherche na Skalo. A

Andrade ta splika ku awor ku el a entrega e keho e ta bai duna espasio na Ministerio Públiko pa hasi e investigashon i si e mester tuma nota ku e ta durando muchu e lo bati pil atrobe na Ministerio Públiko.

“Mi no por papia pa señor Calmez, pero ora bo ta entregá un keho bo mester pone e echonan riba papel i hasi e keho”, tabata palabranan di señor Elvis Fabio Andrade lider di partido Union i Progreso.

Login